Barshaǵa ortaq mindet

Jınalǵandar aldynda sóz alǵan «Qazaq tili men mádenıeti» qoǵamdyq birlestiginiń tóraǵasy Meırambek Kıikovtiń kótergen máseleleri áserli shyqty. Ol óziniń baıandamasynda memle­kettik tildiń mańyzyn asha otyryp, ózge etnos ókilderiniń memlekettik tildi ıgerýi tıistigin erekshe atady. Al «Shańyraq» tilderdi oqytý ortalyǵynyń muǵalimi Raýshan Hasenova óziniń «Til taǵdyry – el taǵdyry» atty baıandamasynda memlekettik tildiń taǵdyrsheshti rólin ashyp kórsetýge tyrysty. Sondyqtan da bul tildi qazaq balalarymen qatar ózge de etnos ókilderi erkin meńgerýi kerektigine erekshe den qoıdy. 

Kókshetaý qalasyndaǵy Polıak bilim berý ortalyǵynyń erikti-muǵalimi bolyp júrgen Renata Shenıavska Qazaqstan men Polsha arasyndaǵy bilim berý salasyndaǵy ynty­maq­tastyq jaıy­n sóz etti. Reti kel­gende Renata hanym Pol­shadaǵy Tilderdi damytý orta­ly­ǵynyń basshylyǵy  tarapynan Qazaqstanǵa arnaıy jiberilgenin aıta ketý kerek. Jáne de onyń Dostyq úıindegi jaryq ta jyly kabınetterde balalarǵa polıak tilin úıretý úshin kelýine «Aqmola oblysy polıaktarynyń birlestigi» qoǵamdyq birlestiginiń tóraǵasy Aleksandr Sýhoveskıı qolushyn beripti. Qazirgi tańda 70-ke tarta oqýshy, sonyń ishinde eresekteri de bar jeti topqa bólinip, polıak tilin meńgerýde kórinedi.

Qazaq tilin jetik meńger­gendigimen óńirge tanymal Kók­shetaý qalasyndaǵy №21 orta mektep oqýshysy Elızaveta Bıbrıh jınalǵandardy tánti etti. Ol bir kezderi aqıyq aqyn Muqaǵalı Maqataevtyń óleńderin jatqa oqyp respýblıkalyq «Myń ba­la» mádenı-aǵartýshylyq jo­basynyń jeńimpazy bolǵan edi. «Aqmola oblysynyń tatar­lary men bashqurlary birles­tigi» qoǵamdyq birles­tiginiń tóraǵasy Rafaıl Sýlkar­naev­tyń, Aqmola oblysy ákimi ap­pa­raty janyndaǵy «Qoǵam­dyq kelisim» KMM basshy­sy­nyń orynbasary Manat Ysma­ǵulovtyń jáne Tilderdi oqytý mek­tebiniń jetekshisi Kúl­taı Kárimjanovalardyń ja­sa­­ǵan baıandamalary eshkimdi beıjaı qaldyrmady. Bul rette «Qoǵamdyq kelisim» KMM ádis­teme bóliminiń basshysy Tat­ıana Pıatkova óz kezeginde elimiz­diń barlyq óńirinde bas­taý alǵan Qazaqstan halqy Assam­bleıasynyń respýblıkalyq «Myń bala» tilderdi oqytý jobasyna erekshe toqtaldy. Osylaısha atalǵan shara óz deńgeıinde ótip, óńir­de memlekettik tildiń qan­sha­lyqty meńgerý qajettigin ta­ǵy bir taban jaqyndatqandaı bol­dy.

Asqar TURAPBAIULY, «Egemen Qazaqstan»