– Mektebimizge Abaı aty teginnen-tegin berilip otyrǵan joq. Bul oqý ornynda júıeli túrde jumys istep kele jatqan aqyndar synyby bar. Abaı oqýlarynyń jeńimpazdary da jeterlik. Ári qaraı da aqyn rýhyn asqaqtata beremiz dep oılaımyn, – dedi saltanatty rásimde sóz alǵan mektep dırektory Esimhan Ákitbaev.
Qazaqtyń bas aqynynyń esimi ulyqtalyp, qurmettelip jatqanda, jas aqyndar qarap qala ma?! Bilim ordasyndaǵy aqyndar synybynyń tálimgerleri jyrdan shashý shashty. Osy mekteptiń 10-synyp oqýshysy Qundyz Tasqynbekqyzynyń «Jaýqazyn jyr» atty tyrnaqaldy kitabynyń tusaýkeser rásiminiń ótýi de sharanyń shyraıyn kirgize túskendeı boldy.
Taǵy bir jaǵymdy jańalyq, bul kúni mektep ishinde Abaı Qunanbaıuly atyndaǵy shaǵyn murajaı saltanatty túrde ashyldy. Bul jerde aqynnyń ómiri men shyǵarmashylyǵynan syr shertetin qundy maǵlumattarmen qatar, keli-kelsap, at ábzelderi syndy ulttyq jádigerlerge de oryn berilipti.
Shara sońynda О́skemen qalasynyń qurmetti azamaty Esim Ákitbaev, О́skemen qalasynyń jergilikti ózin-ózi basqarý komıtetiniń jetekshisi Serik Orazbaıuly túrli saıystarda mekteptiń atyn asqaqtatyp júrgen talantty oqýshylardy «Abaı» tósbelgisimen marapattady.
Reti kelgende aıta keteıik, byltyr el Táýelsizdiginiń 25 jyldyǵyna oraı óńirdegi birqatar bilim oshaqtaryna qazaqtyń uly tulǵalarynyń esimderin berý týraly sheshim qabyldanyp, О́skemendegi eki mektepke oıshyl aqyn Shákárim men ǵalym Zákı Ahmetovtiń aty berilgen bolatyn.
Azamat QASYM, «Egemen Qazaqstan»
О́SKEMEN