Ár aıtystyń óz jańalyǵy bar. Jańalyǵy joq aıtys halyq tarapynan jyly qabyldanbaıdy da. Jas aqyndardyń 12 juby sóz saıystyrǵan aıtys mazmuny jaǵynan baı, qoǵamdaǵy kúrmeýi qıyn taqyryptardy kórkem oımen baılanystyra qozǵaýymen baıyrǵy qundylyǵyn arttyra túskendeı áserde qaldyrdy. Aıtyskerler erkin oı tolǵap, ózekti máseleni dóp taýyp, keń kósile qulashtap jyrlaýymen aıtys ónerine ózinshe órnek saldy.
Almaty, Astana, Qostanaı, Aqtaý, Taraz, Qyzylorda, Qaraǵandy, Oral, Aqtóbe qalalarynan kelgen jasy 30-ǵa jetpegen sýyrypsalma júırikter aıtys kórigin, negizinen, bilim men ǵylym taqyryby tóńireginde qyzdyrdy. Aqyndardyń biri stýdent, biri muǵalim bolǵandyqtan, bul saladaǵy máselemen jete tanys ekenin ár sózimen dáleldep, tyń teńeýlerimen tanytty.
«Bilimdige dúnıe jaryq» ataýyn uran etip alǵan uıymdastyrýshylar «bilimsizdiń kúni ǵarip» ekenin aqyndardyń órnekti oıymen, kesteli tilimen kópshilikke jetkizýdi murat tutqany aıqyn. Bilim muhıtynan mańyzdysy men nárlisin súzip alyp, eńbekpen el kóshin alǵa súıreıtin, bolashaqtyń tizginin ustaıtyn bilimdi jastar ekenin ár aqyn shýmaqtarymen shymyr óre bildi. Ázirge alaman aıtystarda top jarǵan dúldúl bolmasa da, aldaspan sózdiń dodasyna bastap barar alǵashqy baspaldaq osy taqylettes saıys bolatyndyqtan, jas júırikter tosylyp qalmaýǵa tyrysyp, janyn saldy. Iyǵyna «aıtys aqyny» degen úlken ataqty ilgenimen, orda buzar jasqa jete qoımaǵandyqtan, jas aqyn esebinde kelgen júırikter bir-birimen ádemi ázil-qaljyń jarastyrdy. Jigerli jastyqqa tán qasıettiń biri qaljyń bolǵandyqtan, onysy jáne jarasymdy shyqty.
«Shymkenttiń qyzyn súıgen em, qalyńmalyn estigen soń, jalǵyz qaıttym úıge men», degen sekildi joldar kúlki shaqyrǵanymen, bul aqynnyń eski dástúrdiń áleýmettik astaryna jańasha qaraýǵa shaqyrǵan tuspaly sekildi sezildi. Ásirese, aqtaýlyq jas aqyn Abaı Jolmaǵambetovtiń joǵary oqý oryndaryndaǵy sabaǵyna salǵyrt qarap, nátıjesinde, qandaı mamandyqty oqyp shyqqanynan habary joq stýdentterdi syn sadaǵyna ala otyryp: «eki beti qyzarmaı, eń sońynda, dıplomy qyzaryp shyǵa keled» degen ashy sózi búgingi bilim júıesindegi beti búrkemelenip júrgen shyndyqtyń perdesin sypyrǵandaı boldy. A.Jolmaǵambetov osy aıtystaǵy ýytty oıyn utymdy ázilmen árlendirip, sypaıy sózben ekijúzdilik pen ótiriktiń terisin sydyryp, kópshiliktiń kóńilinen shyqqan birden-bir aqyn ekenin dáleldedi.
Sonymen, aıtystyń bas júldesin tarazdyq Áset Dúısebaev enshiledi. Al birinshi oryn Oraldan kelgen «Qadyr Myrza Áli» ortalyǵynyń jas mamany Talǵat Myqıǵa buıyrdy. Halyq lyq tolǵan Stýdentter saraıynda ótken sóz dodasyna Astanadan kelgen 8-synyp oqýshysy Dıas О́tepbergen de qatysyp, balǵyndyǵyna qaramastan sýyrypsalma sóz ónerinde taıtalasa alar tegeýrini, kem túspeıtin keleshegi baryn baıqatty. Shaqtaýly shaǵyn ortada shamasyna qaraı shapqan ár aqyndy ekpinine qaraı ekshep, aldaǵy dúbirli jarystar aldyndaǵy ashy terin sypyrǵan aıtys qoǵamǵa da, bılikke de oı salýymen óz maqsatyn oryndady.
Aıgúl AHANBAIQYZY, «Egemen Qazaqstan»
ALMATY