Gravıýrany ádette qatty zattardyń betine (ol metall, aǵash nemese tas bolýy múmkin) salady. Sodan keıin onyń betine boıaý jaǵyp, basý arqyly birneshe túrin alady. Áıgili gollandyq sýretshi Rembrandttyń dál osyndaı ádispen salynǵan «Kresten túsirip alý» kartınasy murajaıdyń grafıkaǵa arnalǵan zalynyń tórinde tur.
Jalpy, HVII-XVIII ǵasyrlarda eýropalyq sýretshiler táýrattyq taqyryptarǵa, Injildegi oqıǵalarǵa arnalǵan sýretterdi kóptep salǵany belgili. Ásirese, Isa paıǵambardy kresten sheship alý sııaqty sátterdi kóptep beınelegen. Sondaı-aq, grek ańyzdaryna boılap, Amýr, Zevs qudaılaryn keıiptegen. Bul rette Rembrandt Harmens Van Reınniń kartınasyn ıtalııalyq jumystarmen salystyrýǵa bolady. Máselen, gollandyq qylqalam sheberiniń týyndysynda Isanyń álsiz haldegi kúıi beınelense, ıtalııalyq sýretshiler Isany barlyq kúsh-qýatyn kórsete otyryp beıneleıdi. Iаǵnı, Rembrandt oqıǵany shynaıy beıneleýimen, adamdardyń júzindegi muń, qaıǵy-qasiret tabyn jetkize bilýimen, tipti, oısyzdyqty, nemquraıdylyqty, súlesoqtyqty da aıta bilýimen alǵa ozady. Kartınada tipti, aspannan bozǵyltym sáýleniń túsip turǵanyn kórýge bolady. Osy bir XVII ǵasyrǵa (1633 jyly salynǵan) tıesili kartınaǵa qarap otyryp, sol zamandaǵy shynaıylyqty jaza alǵan Rembrandttyń sheberligine tánti bolasyz.
− Isany kresten túsirip alý óte keń taraǵan taqyryp. Bul týyndyny bizge biraz jyldar buryn Reseıdiń áıgili A.Pýshkın atyndaǵy beıneleý óneri mýzeıi syıǵa bergen bolatyn. Jalpy, gravıýranyń keskindeme nemese jaı týyndydan ereksheligi, bir gravıýranyń birneshe kóshirmesin ǵana jasaýǵa bolady. Iаǵnı, alǵashqy úsh-tórt kóshirmesi anyǵyraq shyǵatyndyqtan óte qundy, túpnusqa sanalady. Al qalǵan nusqalarynyń boıaýy tez ońyp ketedi. Sondyqtan Rembrandttyń bul týyndysy alǵashqy túpnusqaǵa jatatyn óte qymbat jádigerlerdiń biri, − deıdi mýzeı qyzmetkeri Gúljan Jákeeva.
Dýman ANASh,
«Egemen Qazaqstan»
SEMEI