Endi qazaqstandyqtardyń daıyn qujattardy alý úshin HQKO-ǵa barýdyń qajeti joq, kez kelgen kórsetilgen orynǵa, úı bolsyn, keńse bolsyn, kýrer jetkizip beretin bolady, dep habarlady «Azamattarǵa arnalǵan úkimet» memlekettik korporasııasy» kommersııalyq emes aksıonerlik qoǵamy baspasóz qyzmeti.
Bul servısti paıdalaný úshin tutynýshy qyzmet alýǵa qajetti tolyq qujattar paketin HQKO ınspektoryna ótkizedi jáne daıyn qujattardy jetkizip berý jónindegi ótinimdi toltyrý úshin HQKO ǵımaratynda ornalasqan «Qazposhta» AQ qyzmetkerlerine júginedi. Qujattardy jetkizip berý qyzmeti jeke jáne zańdy tulǵalarǵa kommersııalyq negizde kórsetiledi.
Úıge jetkizip berý baǵasy qyzmet kórsetiletin aımaqqa jáne sońǵy jetkizilim mekenjaıyna baılanysty bolady. Jetkizilim jaıly aqparatty berilgen trek-nómiri boıynsha post.kz saıtynan qadaǵalap otyrýǵa bolady. Qyzmettiń eń tómengi quny – 500 teńge. Qyzmet alýshy jetkizilim tólemin daıyn qujattardy alǵannan keıin júrgizedi.
«Azamattarǵa arnalǵan úkimet» memlekettik korporasııasy» KE AQ Basqarma tóraǵasy Abylaıhan Ospanovtyń aıtýynsha, jańa qyzmet HQKO-ǵa kelýge ýaqyty tapshy jandarǵa arnalǵan.
Qazirgi ýaqytta qyzmetterdi avtomattandyrý jumystary belsendi túrde júrip jatyr. Kóptegen qazaqstandyqtar qyzmetti elektrondyq úkimet portalynyń kómegi arqyly úıden shyqpaı-aq alady.