Bas prokýrotýrada qylmystyq isterdi elektrondy túrde qaraıtyn "Zańdylyq" atty júıeni engizýge qatysty jıyn ótti, dep habarlaıdy kapital.kz.
"Zańdylyq - elektrondy qylmystyq is" atty aqparattyq júıe qylmystyq prosesterdi qysqartý men sapasyn arttyrýǵa jáne tergeýshi, prokýror men sýdıalardyń qatelikterin azaıtýǵa baǵyttalǵan. Júıe "Sotqa deıingi tergeýdiń birińǵaı reestrine" engizilýi múmkin.
«Qazirgi tańda qylmysty tergeý boıynsha sotqa deıingi óndiris jumystary óte kúrdeli jáne kóp. Bul adam resýrsy, qarjy men ýaqytty shyǵyndaıdy. Sonymen qatar, istiń qaǵazben júrgizilýi keı málimetterge qoljetimdilikke kedergisin keltirip, atqarylatyn jumystyń sapasyna keri áser etedi", - deıdi Bas prokýrotýranyń Quqyqtyq statıstıka jáne arnaıy esepter komıtetiniń tóraǵasy Baǵdat Mýsın.
"Zańdylyq - elektrondy qylmystyq is" atty aqparattyq júıesi málimetti tolyǵymen sandyq júıege kóshiredi. Bul qaýipsizdik turǵysynan da paıdaly. Sonymen qatar, qylmystyq isti qurý, tergeýden bastap sot úkimi shyqqanǵa deıingi aralyqtaǵy jumystar birińǵaı bazada ashyq júrgiziledi.