«Elbasynyń beıbit saıasaty men ekonomıkalyq reformalary arqasynda Qazaqstan jaǵdaıy nashar elder úshin tartymdy bolýy múmkin. Osyny esepke alyp, kóshi-qon jaǵdaıynyń ýshyǵýyn kútpeı, kóshi-qondy retteý men ulttyq birlikti saqtaý sharalaryn daıyndaý kerek dep oılaımyz. Eń aldymen «Azamattyq týraly» Zańǵa ózgeris engizip, azamattyq alǵysy keletinder úshin Qazaqstan Respýblıkasynyń Konstıtýsııasyn, mádenıeti men tarıhyn, tildik saıasatyn bilý boıynsha emtıhan normalaryn jasaý kerek», – deıdi «Aq Jol» partııasy atynan suranys oqyǵan Azat Perýashev.
Depýtat munda esh kemsitý joqtyǵyn aıtady.
«10-bapqa sáıkes Respýblıka azamattyǵynyń dárejesi artady, óıtkeni, terrorızm jáne ulttyq múddege zııan keltirgender azamattyqtan aıyrylady. Eýropa tájirıbesi jaǵdaı nasharlaǵan elderden kóshi-qonnyń artýy apattyq sıpat ıelengenin kórsetip otyr. Qabyldaýshy elder bıýdjetten artyq shyǵyn shyǵaryp, ol elderdegi densaýlyq saqtaý men áleýmettik qamsyzdandyrýǵa salmaq túsip, jumyssyzdyq artyp, qylmystyq jaǵdaı ýshyqqan», – dep atap ótti ol.
Sonymen birge, tili men dini bólek mıgranttardyń kóptep kelýi ulttyq birlikti saqtaýǵa zııanyn keltiredi. Perýashevtiń sózinshe, azamattyq alýǵa tapsyratyn emtıhandar kóshi-qon úshin tartymdy elderdiń kóbinde bar. Onyń ústine olar aqyly bolǵandyqtan bıýdjetke shyǵyn keltirmeıdi. Tipti keı elderde mundaı emtıhandardy azamattyq alǵysy keletinder ǵana emes, eńbek mıgranttary da tapsyrady. Bul til men dástúr bilmeýden jergilikti turǵyndarmen arada qaqtyǵystyń aldyn alý maqsatynda jasalady.