Jumys tobynyń quramynda komıtet músheleri, senatorlar I.Adyrbekov, M.Altynbaev, N.Ábiqaev, S.Jaqsybekov, L.Qıynov, G.Kım bar. Olardy áýejaıdan oblys ákimi Janseıit Túımebaev kútip aldy.
Komıtet músheleri, eń aldymen, Qazaqstan Qarýly Kúshteriniń Shymkent garnızonynda bolyp, jeke quramnyń kúndelikti tynys-tirshiligimen tanysty. Sondaı-aq, avıasııalyq bazanyń áskerı bólimderindegi jaýyngerlik kezekshiliktiń uıymdastyrylýyn, Sý-25, MıG-29 ushaqtary men Mı-17, Mı-171 Sh jáne Mı-35 M tikushaqtary turǵan áýe shabýylyna qarsy qorǵanys áskerlerin kórdi. Radıotehnıkalyq jáne zenıttik zymyran eseptoptary men áskerı avıasııa ekıpajdarynyń jaýyngerlik múmkinshilikterin tamashalady.
Budan soń Qazaqstan Respýblıkasy Ulttyq ulany «Ońtústik» óńirlik qolbasshylyǵynyń Shymkent qalasyndaǵy 6506 áskerı bólimine arnaıy keldi. Kezdesý barysynda Ulttyq ulannyń «Ońtústik» óńirlik qolbasshylyǵynyń qolbasshysy, general-maıor Qaırat Aqtanov depýtattardy elimizdiń «Ońtústik» óńirlik qolbasshylyǵy 6506 áskerı bóliminiń jaýyngerlik qyzmeti jáne áskerdiń jeke quramyna júktelgen quqyq qorǵaý mindetteri týraly, sondaı-aq, áskerı qurylymdy odan ári damytýdaǵy keleshekte atqarylatyn ister jaıynda habardar etti.
Sapar barysynda senatorlarǵa tehnıkanyń, qarý-jaraq pen qorǵanys quraldarynyń jańa úlgileri, sondaı-aq, Ulttyq ulan qamtamasyz etilgen kıim úlgileri tanystyryldy. «Jas búrkit» áskerı-patrıottyq klýbynyń jaýyngerleri ózderiniń ádis-tásilderinen qoıylymdar kórsetti. Komıtet músheleri garnızondaǵy ishki áskerdiń 1995 jyly tájik-aýǵan shekarasynda qaza tapqan jaýjúrek 17 jaýyngeriniń eskertkishine taǵzym etip, gúl shoqtaryn qoıdy.
Baqtııar TAIJAN,
«Egemen Qazaqstan»
Ońtústik Qazaqstan oblysy