Otyrysqa jetekshilik etken Astana qalasy ákiminiń orynbasary Ermek Amanshaev búgingi tańda Astana qalasynda 12 jeksenbilik mektep jumys isteıtinin jáne ol jerlerde 600-ge jýyq qatysýshy belsendi bilim alyp, ulttyq qundylyqtar jóninde tanym-túsinikterin keńeıtip jatqanyn atap ótti. Al Májilis Tóraǵasynyń orynbasary Vladımır Bojko bul kezdesý Assambleıanyń kezekti sessııasyna daıyndyqty pysyqtaý ekendigin tilge tıek etti.
«Búgin biz QHA depýtattyq top ókilderi Astana qalasyndaǵy etnomádenı birlestikterdiń belsendi múshelerimen kezdesip, Assambleıanyń kezekti sessııasyna daıyndyqty pysyqtaý ústindemiz. XXV sessııanyń kún tártibine shyǵarylyp, talqylanatyn máselelerdi osyndaı basqosýlar arqyly naqtylaýdamyz. Árıne, bizdiń aıtatyn áńgimemiz qaı kezde de tatýlyq pen beıbitshilik bolýy tıis. О́ıtkeni, yntymaq, birlik, kelisim bolmaǵan jerde qaryshty damıtyn ekonomıka da, ósip-órkendeıtin kásiporyn nemese sapaly qyzmet kórsetý salasy da keń qanat jaımaıdy. Sondyqtan da mundaı keńesterdi aldaǵy ýaqytta respýblıkamyzdyń barlyq óńirlerinde uıymdastyrýdy josparlap otyrmyz. Al búgingi basqosýda talqylanýy tıis taqyryp – QHA aıasyndaǵy mádenı birlestikterdi qarjylandyrýdyń múmkindigin arttyrý men qazaq tilin oqytyp, úıretý arqyly onyń qoldanys aıasyn keńeıtý bolyp tabylady», – dedi V.Bojko.
Sondaı-aq, kezdesý barysynda qoǵam damýynyń ózekti máselelerin sheshýdegi Qazaqstan halqy Assambleıasynyń rólin arttyrý jaıy aıtylyp, etnosaralyq jáne konfessııaaralyq qarym-qatynastardy úılestirý salasynda el Parlamentiniń QHA men memlekettik organdarmen jáne azamattyq qoǵam ınstıtýttarymen ózara tıimdi is-qımyldaryn qamtamasyz etýdiń negizgi baǵyttary sóz boldy.
Esterińizge sala keteıik, keler aıdyń sońǵy sársenbisinde Astanadaǵy Beıbitshilik jáne kelisim saraıynda «Jańǵyrýdyń negizi – turaqtylyq, birlik, kelisim» kún tártibimen Qazaqstan halqy Assambleıasynyń XXV sessııasy ótedi dep kútilýde.
Nurlybek DOSYBAI,
«Egemen Qazaqstan»