Darıǵa Nazarbaeva: Áskerılerdiń áleýmettik máseleleri sheshiletin bolady

Talqylaý aldynda senator­lar Ikram Adyrbekov, Muhtar Altynb­aev, Serik Jaqsybekov, Georgıı Kım, Lázzat Qıynov Sary­aǵash shekara jasaǵynyń «Jibek joly» ótkizý beketi men «Dar­han» shekara zastavasynda bol­dy. Olar qazaqstandyq shekara­shy­lardyń jaýyngerlik qyz­metimen tanysyp, ınfra­qu­rylym nysandaryn aralady.

Elimizdiń Shekara qyzmetiniń ba­sshysy, general-maıor Dar­han Dilmanov otyrys barysyn­da shekaradaǵy qazirgi jaǵdaı, atqarylǵan jumystar, sondaı-aq sheshýdi talap etetin ózekti máse­leler týraly jan-jaqty habardar etti. «Ulttyq qaýipsizdikke tónetin qaýip-qaterlerdi (terrorızm, ekstremızm, esirtki, qarý-jaraq kontrabandasy, zańsyz kóshi-qon) eskere otyryp, Shekara qyzmeti shyǵys jáne soltústik baǵyttardaǵy shekarany kúzetý deńgeıin tómendetken joq, ári basty nazardy ońtústik jáne ońtústik-batys strategııalyq baǵyt­tarǵa aýdarýda», – dedi UQK Tóraǵasynyń orynbasary-Shekara qyzmetiniń dırektory D.Dil­manov.

Qazirgi tańda Qazaqstan-Qyr­ǵyzstan jáne Qazaqstan-Túrik­menstan memlekettik shekarasyn shegendeý prosesi aıaqtaldy. Qazaqstan-Qyrǵyzstan shekarasyn shegendeý men tártibi týraly halyqaralyq sharttarǵa qol qoıýǵa daıyndyq jáne kelisý jumystary júrgizilýde.

2017 jylǵy qańtardan bastap búgingi kúnge deıin Memlekettik shekarany kúzetý kezinde shekara aımaǵynda 3 545 quqyq bu­zý­shylyqtyń joly kesildi. 75,5 kılogramm esirtki zaty (onyń ishinde, 50 kılogramnan astamy – geroın), sondaı-aq 16 qarý men 523 oq aınalymnan alyndy.

Darıǵa Nazarbaeva Ońtústik Qazaqstan oblysyna eki kúndik sapardy qorytyndylaı kelip, shekara qyzmetiniń tehnıkalyq jab­dyqtalýynyń joǵary deń­geıin atap ótti. «Bul salanyń basym­dyqqa ıe ekeni barshaǵa belgili, áskerı qyzmetshilerge áleýmettik jaǵynan qorǵalýy úshin barlyq jaǵdaı jasalady. Májiliste áskerı qyzmet týraly zańnamaǵa áskerı qyzmetshilerdi turǵyn úımen qamtamasyz etý máse­lelerin eleýli túrde jeńilde­tetin túzetýler engizildi. Ol – óte aýqymdy jumys, ony depýtat­tar­dyń eńbegi dep sanaımyn», – dedi senator respýblı­kalyq jáne aımaqtyq buqaralyq aqparat quraldary ókilderine bergen suhbatynda.

Komıtet tóraıymy D.Nazar­bae­va bıýdjet qarjysyn eleýli túrde ońtaılandyratyn biryńǵaı avıasııa qyzmetin qurý kerek dep sanaıdy. «Jalpy alǵanda, qıyndyqtarǵa qaramastan, adal qyzmet etetin bizdiń áskerılerge rızashylyǵymdy bildiremin. Biz osy mamandyqty tańdaǵan adamdarǵa zor qurmetpen qarap, olardyń amandyǵyna tilekshi bolýymyz kerek. Alda Qazaqstan Qarýly Kúshteriniń 25 jyldyǵy kele jatyr, sondyqtan bizdiń áske­rı­lerge jýrnalısterdiń nazar aýdarýyn ótinemin. Olar biz­diń beıbitshiligimizdi qamtamasyz etip keledi. Qoǵamdy osy maman­dyq­qa qurmet kórsetýge tárbıe­leý kerek», – dedi senator.

Senatorlar sondaı-aq res­pýb­lıkalyq «Jas ulan» ásker mektebinde boldy. Olar Ota­ny­myzdyń jas qorǵaýshylary – mektep tárbıelenýshilerimen kezdesip, áskerı mektepke kom­pıý­terlik synyp jáne dárigerlik jabdyqtar tartý etti.

Baqtııar TAIJAN,

«Egemen Qazaqstan»