Zań jobasynyń maqsaty azamattyq avıasııa jáne áýe keńistigin paıdalaný salasyndaǵy Qazaqstan Respýblıkasynyń zańnamasyn jetildirý, sondaı-aq, ony Halyqaralyq azamattyq avıasııa uıymynyń (IKAO) standarttaryna sáıkes keltirý bolyp tabylady. Zań jobasy áýe keńistigin jáne avıasııa qyzmetin paıdalaný salasyndaǵy baqylaý men qadaǵalaýdy kúsheıtýge, kórsetiletin qyzmetterdiń sapasyn kóterý men ushý qaýipsizdigin qamtamasyz etýde jaýaptylyqty arttyrýǵa baǵyttalǵan.
Zań jobasy aıasynda sheteldik tasymaldaýshylardy akkredıtteý, kommersııalyq emes uıymdardy tartý jáne áýe kemelerin paıdalanýshylardyń, aeronavıgasııalyq qyzmet kórsetýshilerdiń, avıasııalyq oqý ortalyqtarynyń qyzmetin qadaǵalaý bóliginde azamattyq avıasııa salasyndaǵy ýákiletti organnyń quzyreti naqtylanady jáne tolyqtyrylady. Avıasııa qyzmetkerlerin medısınalyq kýálandyrý júıesin jetildirý kózdeledi, avıasııalyq medısınalyq ortalyqtardy sertıfıkattaýdyń jańa túri usynylady. Tergep-tekserý jónindegi ýákildiń qyzmeti retteledi.
Zań jobasynyń birqatar erejeleri azamattyq avıasııada avıasııalyq qaýipsizdik baǵdarlamasyn engizý, medısınalyq sarapshylarǵa, aeronavıgasııalyq qyzmet kórsetýdi berýshilerge jáne laýazymdy adamdarǵa jaýaptylyqty bekitý, sondaı-aq, sertıfıkasııalyq tekserý kezinde sanattardy engizý arqyly avıasııalyq qaýipsizdikti qamtamasyz etýge baǵyttalǵan.
Odan basqa, zań jobasymen shaǵyn avıasııany damytýǵa, ushqyshsyz ushatyn apparattardy esepke alýǵa, arnaýly ushýǵa ruqsat alý men áýe kemelerin paıdalanýshylarǵa jalǵa berýde ákimshilik kedergilerdi joıýǵa qatysty erejeler engiziledi.
Zań jobasy palatanyń qaraýyna jiberildi, dep habarlady Parlament Senatynyń baspasóz qyzmeti.