Jigeri men júziniń jylylyǵyn joǵaltpaǵan ájemiz jýyrda taǵy da jarq etip keldi. Jetisý óńirinde Ilııas Jansúgirov atyndaǵy Mádenıet saraıynda Ardagerler uıymynyń 30 jyldyq mereıtoıyna oraı ótken «Qarttardyń da ónerge bar talasy» atty úlken konsertte ata-apalardyń eń úlkeni de osy Úmitjan Botbaeva bolǵan.
Súıkimdi bir bıshi ájemiz Almaty oblysy, Jambyl aýdanynyń turǵyny. Bul kisi úshin bı – ómiriniń máni, densaýlyǵynyń tiregi ekendigin aıtady. Senseńizder, esin bilgeli beri bılep keledi. О́te kishkentaı kúninde áke-sheshesi jetektep turyp, toı-tomalaqqa barǵanda bıletedi. Jurt onyń tamasha bıine tań-tamasha qalyp, rızashylyqpen qoshemet kórsetedi eken.
– Sodan keıin mektepte de bıshi boldym. Bir kúni bizdiń mektepke áıgili bıshi Shara Jıenqulovanyń ózi keldi. Meniń bılegenimdi kórip, balet ónerine oqýǵa shaqyrdy, – deıdi ónerli ájeı.
Jazmysh bolar, biraq Úmitjan apamyzǵa úlken sahnaǵa shyǵý jas kezinde buıyrmapty. Qalaǵa baryp bı ónerin kásipqoı turǵyda meńgerýge anasy qarsy bolady. Boıjetip te úlgermegen qyz qalaǵa baryp, ómiri nendeı bolady dep oılaıdy ǵoı. Esesine ony ata-anasy 20 jasynda kúıeýge beredi. Botbaeva biraz ýaqytqa deıin ónerden qol úzip qalsa da, keıin qaıta bılep júredi. Sodan beri de 30 jyl óte shyqqan eken.
– Men barlyq kezde bılep kele jatyrmyn. Tek qan oınatar mýzyka bolsyn! Mýzykanyń alǵashqy akkordtaryn estigen sátten bastap-aq, meniń denem ózi qımyldaı bastaıdy. Kóbinese, óz tanystarym men jaqyndarymnyń toıynda bıleımin. Biraq, bógde adamdardyń aldynda bıleı bermeımin. Eger bılemeı qalsam, kelesi kúni-aq aýyryp qalamyn. Densaýlyǵym bıge táýeldi. О́mirimdi bımen órgen men jastarǵa aıtarym: «Men sııaqty bıleseńder, 100 jasaısyńdar», – deıdi 86 jastaǵy dala bıshisi.
Aınash ESALI,
«Egemen Qazaqstan»
ALMATY