Oǵan «Atameken» UKP basqarma tóraǵasynyń orynbasary Rústem Júrsinov, Ulttyq ekonomıka mınıstrligi janyndaǵy «Ekonomıkalyq zertteýler ınstıtýty» AQ salalyq saraptama ortalyǵynyń dırektorlary Aıjan Tólepbekova men Dınara Aqynbekova qatysty.
Jıynda R.Júrsinov «Iskerlik ahýal – 2016» zertteýi Qazaqstandaǵy kásipkerlikti damytý men bıznesti jaqsartýǵa múmkindik beretinin atap ótti.
–«Áleýmettik zertteýdi «Atameken» Ulttyq kásipkereler palatasynyń tapsyrysymen Ulttyq ekonomıka mınıstrliginiń janyndaǵy Ekonomıkalyq zertteýler ınstıtýty júrgizdi. Saýalnamaǵa 2016 jyly 4100 respondent-kásipker qatysty, bul kórsetkish 2015 jylmen salystyrǵanda 2 ese kóp, – dedi Rústem Júrsinov.
Dınara Aqynbekovanyń aıtýynsha, zertteýdiń maqsaty Qazaqstandaǵy iskerlik ahýaldyń jaǵdaıyn zertteý, kásipkerlikti damytý úshin jaqsy jaǵdaı jasalǵan nemese jaǵdaıy joq oblystardy anyqtaý boldy.
–«Reıtıng aıasynda ákimshilik retteý, memlekettiń bıznesti qoldaýy, jyljymaıtyn múlik pen ınfraqurylym, adam resýrsy, qarjylyq resýrs, sondaı-aq sybaılas jemqorlyq pen kóleńkeli ekonomıka deńgeıi sekildi kórsetkishter eskerildi, – dep atap ótti Aıjan Tólepbekova.
Onyń aıtýynsha, zertteýdiń qorytyndysy Almaty qalasynda kásipkerlikti damytýǵa anaǵurlym jaqsy jaǵdaı jasalǵanyn kórsetken.
–2015 jylǵy kórsetkishpen salystyrǵanda Almaty eki tarmaqqa joǵary kóterilip, Astana qalasyn ekinshi orynǵa túsirdi. Sonymen qatar Ońtústik Qazaqstan oblysy úshinshi oryndy ıelengen. Bul oblys 2015 jylǵy kórsetkishin úsh satyǵa jaqsartqan. Reıtıngti aıaqtaıtyn óńirler qatarynda Soltústik Qazaqstan, Qostanaı jáne Qyzylorda oblystary bar, – dedi ol.
Saýalnamaǵa qatysýshylar kedendik organdarda, ekonomıkalyq zertteý qyzmeti men kólik ınspeksııasynda sybaılas jemqorlyq deńgeıi joǵary dep kórsetken. Onyń ishinde sybaılas jemqorlyq deńgeıi Jambyl, Qostanaı, Batys Qazaqstan oblystarynda joǵary dep tanylǵan. Sonymen birge sybaılas jemqorlyqqa qarsy baǵdarlamalardyń tıimdiligine de baǵa berildi. Zertteý barysynda memlekettik organdardyń jumysy da baǵalandy. Kásipkerlerdiń memlekettik qoldaý týraly aqparat alýy 2015 jylmen salystyrǵanda 1,5 esege artqan, al «Bıznestiń jol kartasy – 2020» baǵdarlamasyna qatysýshylar úlesi 4,8 paıyzǵa ósken. Saraptama boıynsha memlekettik organdardyń tıimdi jumysyna kedergi keltiretin negizgi máseleler ekeni anyqtaldy, onyń ishinde respondentterdiń 29,53 paıyzy qujattardy qaraý merziminiń uzaqtyǵy men qaǵazbastylyqty kórsetken. Sondaı-aq saýalnamaǵa qatysýshylardyń 14,75 paıyzy qyzmetkerler biliktiliginiń tómendigin ataǵan.
Al Dınara Aqynbekovanyń aıtýynsha, maman máselesine qatysty saýalnamada kásipkerlerdiń barlyǵy óz isimen aınalysý úshin baspana máselesin alǵa tartqan. Odan keıin medısınalyq qyzmet pen áleýmettik ınfraqurylymnyń jaqsy bolýyn atap kórsetken. Sol sııaqty qaýipsizdik pen quqyqtyq tártipke kóp kóńil bólgen.
Dastan Kenjalın,
"Egemen Qazaqstan"