Vengrııa úkimeti Qazaqstandy strategııalyq áriptes retinde sanaıdy. Sondyqtan eki eldi áýe arqyly jalǵaıtyn tikeleı reıster ashý óte mańyzdy dedi Vengrııanyń Ulttyq ekonomıka mınıstri Mıhaı Varga Býdapeshtte ótken baspasóz máslıhatynda. Ol áýe qatynasyn ashý arqasynda eki el arasynda ekonomıkalyq, mádenı jáne týrızm salasyndaǵy baılanystar odan árı tereńdeı túsedi dep senetinin aıtty. Baspasóz máslıhatynda sóılegen Qazaqstannyń Vengrııadaǵy Elshisi Nýrbah Rústemov bul oqıǵanyń eki el úkimeti jasap kele jatqan kóp jylǵy eńbektiń jemisi ekenin jáne eki el arasyndaǵy dıplomatııalyq baılanystardyń 25 jyldyǵyna oraı ashylǵanyn aıtty.
«Qazaqstan – Vengrııanyń Ortalyq Azııadaǵy basty strategııalyq áriptesi. Eki el de qarym-qatynasty tereńdete túsýdi maqsat etedi. Ashylǵaly otyrǵan áýe reısi eki astanany ǵana baılanystyryp qoımaıdy. Munyń arqasynda ekonomıkalyq damý áleýeti joǵary eki aımaq – Ortalyq jáne Shyǵys Eýropa men Ortalyq Azııa arasynda áýe baılanysy ornaıdy. Jedel damyp kele jatqan ekonomıka habtarymen baılanys ornatý – biz úshin asa paıdaly dedi Mıhaı Varga.
Mınıstr taǵy bir mańyzdy shara retinde ótken jyldyń qazan aıynda iske kirisken Qazaq-Vengr strategııalyq keńesin atady. Bul organ eki el arasyndaǵy yntymaq, ásirese mádenıet jáne bilim salasyndaǵy baılanystar tereńdetý baǵytynda jumys istemek.
«Bıyl Astanada ótetin EXPO-2017 kórmesine Vengrııanyń qatysqaly otyrǵanyn, kórmege shamamen 3 mıllıon adam keledi degen boljam bar ekenin eskersek, eki el arasynda tikeleı reıstiń der kezinde ashylǵaly otyrǵanyna kózimiz jetedi» dep málimdedi Mıhaı Varga.
Astana men Býdapesht arasynda reıs aptasyna eki ret – beısenbi jáne jeksenbi kúnderi bolady. Al bir baǵytqa bılet baǵasy 40 eýrodan bastalmaq. Alǵashqy ushaq 8 maýsym kúni ushady.