Máselen, keshe Otyrar aýdanynda oblystyq mańyzy bar Sháýildir-Aqdala tasjolynyń 3 shaqyrymyndaǵy dambaǵa uzyndyǵy 150 metr jerge 3000 dana qap topyraq salynǵan bógetter qoıyldy.
Dambany nyǵaıtý jumystaryna aýdandyq tótenshe jaǵdaılar mekemesi men jergilikti atqarýshy organnyń 50 qyzmetkeri 4 tehnıka jumyldyryldy.
Tótenshe jaǵdaılar departamentiniń habarlaýynsha, «Qazgıdromet», «Qazsýshar» RMK, «Qazseldenqorǵaý» MM OQF gıdrobeketterinen sý qoımalar men ózenderdegi sý deńgeıiniń tolýy jáne aǵyndary boıynsha kúndelikti shuǵyl aqparattar alynýda. Olardyń málimdeýinshe, qazirgi tanda oblys aýmaǵyndaǵy sý tasý jaǵdaıy qaýipti emes, ózenderdegi sýdyń deńgeıi aýmaly kúıdegi deńgeıden tómen, sý qoımalarynda sýdyń deńgeıi orta eseppen jobalyq mólsheriniń 75% quraıdy.
Aıta keteıik, Arys ózenine sýdyń tastalýy kóbeıip, aǵyn sýdyń qarqyndylyǵynan Ordabasy aýdanyndaǵy «Batys Eýropa-Batys Qytaı» trassasyndaǵy kishi kópirdiń negizindegi temir-beton plıtalary shaıylyp ketken bolatyn. Osyǵan baılanysty Arys ózeni sý aǵynynyń bir bóligi qashyrtqy kanalǵa burylyp, nátıjesinde sýdyń deńgeıi tómendedi. Halyqaralyq «Batys Eýropa-Batys Qytaı» tas jolyndaǵy 2226 shaqyrymyndaǵy kópirdi qalpyna keltirý jumystaryn jol mamandary júrgizýde. Búginde jol qozǵalysy Ordabasy aýdany Temirlan eldi mekenindegi aınalma jol arqyly uıymdastyryldy.
Qazgıdromettiń málimetinshe, 3 sáýirde jaýyn-shashyn boljamyna sáıkes óńirdegi alasa taýly ózenderinde jańbyrdyń sýy jınalýy, betkeılik aǵynnyń paıda bolýy kútiledi.