Osyǵan deıin Sen-Perdiń ózi de Qazaqstan atynan halyqaralyq týrnırlerge qatysqysy keletinin ashyq aıtqan bolatyn.
«Ulttyq quramanyń deńgeıinde oınamaǵan edim. Eger Qazaqstan quramasynan usynys túser bolsa, qýana-qýana keliser edim», – degen bolatyn Marten Sen-Per.
Degenmen, hokkeıshiniń bıylǵy álem chempıonatyna qatysatyny belgisiz. Sebebi, Qazaqstan quramasynyń bas bapkeri Edýard Zankoves bul jóninde naqty jaýap bermedi.
Álem chempıonatynda birinshi dıvızıonnyń «A» tobyndaǵy oıyndar Kıev qalasynda 22-28 sáýir kúnderi ótedi. Al joǵary dıvızıonnyń eki joldamasy úshin Qazaqstan, Ýkraına, Avstrııa, Polsha, Vengrııa jáne Ońtústik Koreıa elderi talasady.
Aıta keteıik, Ulttyq hokkeı lıgasynda Sen-Per «Chıkago Blekhos», «Boston Brıýnız» jáne «Monreal Kanadıes» ujymdarynda oınaǵan. Osy komandalarda barlyǵy 39 oıynǵa qatysyp, segiz (3+5) upaı jınady.
Al Qurlyqtyq hokkeı lıgasynda «Neftehımık», «Medveshchak», «Barys» jáne Sýperlıgada «Hımık» komandalarynyń namysyn qorǵady. Munda ol barlyǵy 198 oıynǵa qatysyp, 103 upaı (33+70) jınady.
33 jastaǵy Marten Sen-Perdiń «Barysqa» kelgenine eki jyl boldy. Endi Qazaqstan atynan synǵa túsýge tolyqtaı quqy bar. Ulttyq quramanyń sapyna osymen besinshi soltústikamerıkalyq hokkeıshi qosylyp otyr. Buǵan deıin kanadalyq Kevın Dallmen, Naıdjel Doýs, Dastın Boıd jáne amerıkalyq Brendon Bochenskı tartylǵan.
Kevın Dallmen 2013 jyldyń qańtar aıynda Qazaqstan azamattyǵyn aldy. Búginge deıin ol 2014 jylǵy Olımpıada oıyndarynyń irikteý kezeńine, 2014 jyly Mınskide álem chempıonatyna, 2015 jyly álem chempıonatynyń birinshi dıvızıonyna qatysty.
Naıdjel Doýs Kanada quramasymen 2004 jáne 2005 jyldary jastar arasynda álem chempıonatyna qatysyp, sáıkesinshe kúmis jáne altyn júleger atandy. Al 2016 jyly Qazaqstan quramasynyń namysyn qorǵaýǵa múmkindik aldy.
Dastın Boıd ta alǵashynda óz eliniń atynan iri jarystarǵa qatysqan. Kanada ujymymen 2006 jyly jastar arasynda álem chempıony atanǵan. Al Qazaqstan azamattyǵyn alǵannan keıin 2016 jyly Máskeýde álem chempıonatyna qatysty.
Al amerıkalyq Brendon Bochenskı 2014 jyly Qazaqstan azamaty atandy. Máskeýde ótken álem birinshiligine qatysty.