BBC World brıtandyq telekompanııasy mamyr aıynda kórermenderge Qazaqstannyń iri strategııalyq ınfraqurylymdyq jobalary - «Qorǵas» shekara mańy yntymaqtastyǵy halyqaralyq ortalyǵy, «Qorǵas-Shyǵys qaqpasy» arnaıy ekonomıkalyq aımaǵy jáne Qurǵaq porty týraly derekti fılm kórsetedi. Bul týraly «QazAqparat» HAA tilshisi «Qorǵas» ShYHO» AQ baspasóz qyzmetine silteme jasap habarlaıdy.
Túsirilim toby bir apta boıy Almaty oblysy Panfılov aýdanyndaǵy iri qurylys týraly materıal jınaqtady. Endi shóldi jerde krandar kóterilip, rıchstakerler (konteınerlermen jumys jasaıtyn júk tıegishter) júrip turýda, Qazaqstan men Qytaı kásipkerleri kelissóz júrgizýde, myńdaǵan týrıster taýar satyp alyp, taýarlyq poıyzdar ótip jatyr.
«Bul fılmde Jańa Jibek jolyndaǵy qurylysty ǵana emes, Qorǵastyń tirshiligin kórsetkimiz keledi. Sondyqtan, adamdardyń ómiri týraly, mundaǵy ózgeristerdiń olardyń ómirine qalaı áser etkendigin estigimiz keledi», - dep atap ótti joba jetekshisi Krıs Vest.