Qazaqstannyń bul elmen aradaǵy dıplomatııalyq qarym-qatynasynyń negizi 1992 jyldyń 28 qańtarynda qalanǵan. 1993 jyly Koreıa Respýblıkasynyń Qazaqstandaǵy, al 1996 jyly Qazaqstannyń Koreıa Respýblıkasyndaǵy elshilikteri ashyldy. Sol ýaqyttan beri eki eldiń áriptestik áleýetin arttyratyn tetikter nyǵaıa tústi. Oǵan memleketter basshylarynyń joǵary deńgeıdegi kezdesýleri de yqpal etkeni anyq.
Qos tarap arasyndaǵy baılanystyń bekýine saýda-ekonomıkalyq yqpaldastyqtyń qosqan úlesi zor. Máselen, 2016 jyly Qazaqstan men Ońtústik Koreıa arasyndaǵy taýar aınalymy 676,7 mıllıon AQSh dollaryn quraǵan eken. Onyń 223,5 mıllıon AQSh dollary – eksporttyń, 453,1 mıllıon AQSh dollary ımporttyń enshisinde. О́tken jyldyń qarasha aıynda Qazaqstan Prezıdenti Nursultan Nazarbaevtyń Ońtústik Koreıaǵa memlekettik sapary aıasynda bolashaqta da saýda salasyna aıryqsha kóńil bólinetini, sáıkesinshe, taýar aınalymynyń kólemi de artatyndyǵy, bul rette, qos memleket arasynda naqty jobalardyń qolǵa alynǵany aıtylǵan bolatyn. Brıfıngte sóılegen sózinde Dýlat Baqyshev te saýda-ekonomıkalyq jáne basqa da salalar boıynsha yntymaqtastyqty damytýǵa úlken múmkindik bar ekenin atap ótti.
«Jalpy, 2017 jyl – ekijaqty qarym-qatynastyń óristeýi úshin óte mańyzdy jyl. Sebebi, bıyl dıplomatııalyq baılanystyń ornaǵanyna 25 jyl tolyp otyr. Osy ýaqyt ishinde aýqymdy jumystar atqaryldy. Taraptar arasyndaǵy baılanystyń nyǵaıýyna elimizdegi koreı dıasporasy da úles qosýda. Bulardyń barlyǵy bizdiń damýdyń kelesi, jańa kezeńine aıaq basqanymyzdy bildiredi. Qazir ekonomıkalyq baılanystar belsendi túrde damyp keledi. Bul baǵytta ekijaqty jobalar bar. Mádenı-gýmanıtarlyq saladaǵy áriptestikte de oń dınamıka baıqalady. Osy turǵydan kelgende, bizdi eki el prezıdentteriniń, úkimet basshylarynyń kelissózderi aıasynda qabyldanǵan qujattardy iske asyrý boıynsha aýqymdy jumystar kútip tur», – dedi D. Baqyshev.
Elshi Seýldiń Astanada ótetin EKSPO-2017 halyqaralyq kórmesine de aıryqsha qyzyǵýshylyq tanytyp otyrǵanyn jetkizdi. «Seýl bul kórmege belsendi túrde qatysyp, balamaly energetıka salasyndaǵy óziniń jetistikterin jan-jaqty kórsetedi dep oılaımyz», – dedi ol.
Negizinen, Koreıa Respýblıkasyna shyǵarylatyn qazaqstandyq eksporttyń basty taýarlary – ýran, taza bolat, temir, altyn, mys bolsa, al bizge ol elden keletin ımporttyq ónimder – elektronıka, kólikterdiń qural-jabdyqtary. Qazaqstanda Ońtústik Koreıa kapıtalynyń qatysýymen 900-den astam birlesken kásiporyn tirkelgen. Máselen, búginde elimizde «Samsung C&T», «LG Electronics», «LG Chem», «SK Corporation», «Hyundai», «POSCO» sekildi kásiporyndar men «Dong Il Highville», «Urim», «Kykdong Konsol» sııaqty qurylys fırmalary jumys isteıdi.
Láıla EDILQYZY, «Egemen Qazaqstan»