Búgingi jumys oryndary jármeńkesine soltústik óńirlerdegi 636 jumys berýshi ońtústikqazaqstandyqtarǵa bilim berý, densaýlyq saqtaý, memlekettik basqarý, aýylsharýashylyq pen qurylys salalary boıynsha 1785 bos jumys ornyn usynýda. Sonymen qatar,jármeńkege jergilikti 248 jumys berýshi, onyń ishinde 30 iri kásiporyn 2500 bos jumys oryndaryn usynyp otyr.
Sharaǵa qatysqan QR eńbek jáne halyqty áleýmettik qorǵaý mınıstri Tamara Dúısenova men Ońtústik Qazaqstan oblysynyń ákimi Janseıit Túımebaev halyqqa usynylyp otyrǵan jumys oryndarymen tanysty.
Halqy tyǵyz qonystanǵan Ońtústik óńirinde alǵash ret elimizdiń 4 óńiri men OQO-nyń jumys berýshileriniń bos jumys oryndary jármeńkesiniń uıymdastyrylýy kezdeısoq emestigin aıtqan mınıstr T.Dúısenova búgingi shara halyqtyń jumyspen qamtylýyna septigin tıgizetinine senim bildirdi.
«Munda eńbek kúshi aıtarlyqtaı artyq bolsa, soltústik óńirlerde jumys qolynyń tapshylyǵy seziledi. Sondyqtan, atalǵan jármeńke, OQO turǵyndaryna óz mamandyǵy boıynsha jumys tabýǵa kómektesedi degen úmit bar. Osy oraıda, memleket, jol shyǵyndary men bir jyl boıy baspana jaldaýǵa ketetin shyǵyndy óteýge sýbsıdııa bóletinin atap ótken jón. Eńbek kúshi artyq óńirlerden jumys qory tapshy aımaqtarǵa qonys aýdarý jumysker men jumys berýshiniń ózara qyzyǵýshylyǵy boıynsha erikti túrde júzege asatynyn atap ótkim keledi», - dedi sharanyń ashylý barysynda Tamara Dúısenova.
Osy syndy uqsas jármeńkeler óńirdegi Maqtaaral jáne Saryaǵash aýdandarynda 3-4 sáýir kúnderi soltústik óńirdegi jumys berýshilerdiń qatysýymen ótip, onda 200-den astam turǵyn otbasymen Qostanaı, Pavlodar, SQO jáne ShQO-ǵa qonys aýdarýǵa nıet bildirgen.
О́z kezeginde sóz alǵan oblys ákimi J.Túımebaev halyqty birkelki jaıǵastyrý maqsatynda eńbek kúshi mol aımaqtan, eńbek kúshi jetispeıtin respýblıkamyzdyń soltústik óńirlerine óz erkimen halyqty qonystandyrý óte mańyzdy qadam ekenin atap ótti.
«Elbasy Nursultan Ábishuly Nazarbaev «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna arnaǵan Joldaýynda – eńbek naryǵyn jańǵyrtýda basy artyq jumys kúshi bar óńirlerden jetkiliksiz jerlerge qonystandyrýǵa qatysty jańa mindetteme qoıdy. Sonymen birge aýyldardan qalalarǵa jumys kúshin utymdylyqpen tartýǵa qoldaý kórsetý kerektigi jóninde tapsyrma bergen bolatyn. Búgin Elbasy qoıǵan mindetterdi birlesip júzege asyrý maqsatynda О́ńiraralyq bos jumys oryndar jármenkesi uıymdastyrylyp otyr. Jalpy bizdiń oblysta tabıǵı-klımattyq jáne geografııalyq jaǵdaıynyń qolaılyǵy adam ındeksiniń damýyna oń áserin tıgizedi. Oblysta halyq sany sońǵy on jylda jyl saıyn 2 paıyzǵa ósip, búginde 3 mıllıonǵa jýyqtady. Onyń ishinde aýyldy jerdegi turǵyndar 1 mln 571 myń adamǵa jetip, jalpy halyqtyń 54,9 paıyzyn qurap otyr»,-dedi ákim.
Aıta keteıik, 2016 jyly Ońtústik Qazaqstan oblysynan 146 otbasy Soltústik Qazaqstan (125 otbasy), Qostanaı (18 otbasy) jáne Shyǵys Qazaqstan (3 otbasy) oblystaryna qonys aýdarǵan bolatyn.