Birtutas kommýnıkasııalyq transeýrazııalyq júıe retinde úlken mańyzǵa ıe bolǵan Uly Jibek joly qazir de túrli memleketter, onyń ishinde Qazaqstan men Qytaı elderi arasyndaǵy qazirgi zamanǵy mádenı jáne ekonomıkalyq baılanystardyń damýynda da úlken ról atqaryp otyr.
«Jańa beıne», «Birlesken qurylys jáne paıdalanylýy», «Birlesip ómir súrý men ortaq-
tasa órkendeý» atty 3 bólimnen turatyn kórmege Uly Jibek jolynyń tarıhy ǵana emes, sonymen birge saıasat, ekonomıka, qurylys, bıznes, bilim berý, mádenıet, týrızm jáne sport salalary boıynsha Qazaqstan-Qytaı qarym-qatynastarynyń jetistikteri beınelengen 70-ten astam fotojumys qoıylǵan. Fotosýretshiler jumysynda sondaı-aq, Qytaıdaǵy sáýlet eskertkishteri, kórkem tabıǵı oryndary, kórikti jerleri kórinis taýypty.
Kórmeniń birinshi bólimi halyqtarǵa óz tarıhı-mádenı murasyn saqtaýǵa, beıbitshilik, kelisim, dostyq, jarııalylyq pen tózimdilikti saqtaı otyryp, ómir súrýge múmkindik bergen kezeńnen, ıaǵnı Uly Jibek jolynyń eki myń jyldyq tarıhyn qamtyǵan 26 fotosýretten turady. Fotosýretter arasynda: «Jiayu – Uly kósh», «Býdda úńgirindegi kún sáýlesi», «Yongtai kóne qalasy», «Túngi qaıyqtar saıysy», «Tıbettik Jańa jyl», «Túıeshi», «Kóne aýyldaǵy qaǵaz óndirý», «Júrdek poıyzdar dáýiri», «Aspaly kópir» sııaqty kóptegen jumystardy tamashalaýǵa bolady.
Kórmeniń 25 fotosýret qoıylǵan ekinshi bólimi ekonomıka jáne zaýyttar men qaıta óńdeý kombınattarynyń qurylysy, energetıkalyq, farmasevtıkalyq kompanııalar, bankter men saýda ortalyqtaryn ashý salalary boıyn-
sha ortaq jobalardy iske asyrý maqsatyndaǵy Qazaqstan-Qytaı ózara tıimdi yntymaqtastyqtaǵy qarym-qatynasyn beıneleıdi. Jambyl jáne Ońtústik Qazaqstan oblystaryndaǵy sement zaýyttary, «Taý-ken» Aqtoǵaı zaýyty, «SINOPEC» munaı óńdeý zaýyty, «Moınaq Sý» elektrostansynyń ashylý sátteri, Qazaqstan Prezıdenti N.Á.Nazarbaevtyń «CNPCS» kompanııasynyń Aqtóbedegi fılıalynyń dırektoryn gramotamen marapattaý sáti beınelengen fotosýretter erekshe qyzyǵýshylyq týdyrdy.
Qytaı fotosýretshileriniń Almatyda túsirgen 19 fotosýretinen turatyn kórmeniń úshinshi bólimi: Qytaıdyń salt-dástúrleri, ádet-ǵuryptary, merekeleri, qazirgi damýy, «Shensı provınsııasynan Almatyǵa deıin kelgen 100-den astam adam men túıeler kerýeni» jumysy, QHR Almaty qalasyndaǵy Bas konsýldyǵy ótkizgen «Qytaı taǵamdarynyń merekesi», «Qytaı mádenıetiniń kúni», Qazaq Memlekettik qyzdar pedagogıkalyq ýnıversıtetinde ótken «Til dostastyqtyń kópiri» baıqaýy, «Qytaı sportshylar quramasynyń Konfýsıı mektebiniń oqýshylarymen birge Qytaı Jańa jylyn qarsy alýy», «Qazaqstan-Qytaı dıplomatııalyq qarym-qatynasynyń 25 jyldyǵyna arnalǵan Gala-konsert», «Naýryz meıramy» sııaqty Qazaqstan men Qytaı arasyndaǵy mádenıet pen óner salalaryndaǵy qarym-qatynasty qamtyǵan.
Kórme sáýir aıynyń 11-ine deıin jalǵaspaq.
Mıra BAIBEK,
«Egemen Qazaqstan»
ALMATY