Án – kóńildiń ajary

Ámire Qashaýbaev atyndaǵy dástúrli oryndaýshylardyń úsh kúnge sozylǵan VIII respýblıkalyq konkýrsy márege jetti. «Mádenıet mınıstrliginiń uıym­­dastyrýymen jylyna otyz­­dan astam konkýrs ótki­zilse, olardyń ishinde Ámire Qashaýbaev atyndaǵy dástúrli oryndaýshy­lar baıqaýynyń orny bólek. Keńestik kezeńde bul saıys tórt jylda bir ret ótkiziletin. Al táýelsizdigimizdi alǵaly beri eki jylda bir ret ótkizý múmkin­digine ıe bolyp otyrmyz desek, konkýrstyń maqsaty – ánshi Ámire Qashaýbaevtyń tól mura­s­yn keńinen nasıhattap, urpaq­tan-urpaqqa jetkizý, qaty­sýshylardyń kásibı sheberligin jetildirý, sondaı-aq jastarǵa estetıkalyq turǵyda tárbıe berý, ulttyq jáne álemdik má­denıet qundylyqtardy ıgerýine yqpal etý», – dedi Mádenıet mınıstrligi Mádenıet komıteti tóraǵasynyń orynbasary Roza Káripjanova konkýrstyń ashylý rásiminde. Án báıgesiniń shymyldyǵy Ámire Qashaýbaev óz daýysymen aıtqan Aqannyń «Balqadısha­symen» ashyldy. Konkýrstyń talabyna sáıkes, Otanymyzda jáne alys-jaqyn shet elderde turatyn 16 men 35 jas ara­lyǵyndaǵy halyq jáne qazirgi kompozıtorlar ánderin dombyra, qylqobyz, syrnaı aspaptarynyń súıemeldeýinde oryndaıtyn 38 kásibı ónerpazdardyń ónerin Parlament Májilisiniń depýtaty, aıtýly ánshi Bekbolat Tileýhan bastaǵan qazylar alqasy sarapqa saldy. Saıystyń ashylý rásiminde Bekbolat Tileýhan: «Qazaqta «Baq shaba ma, bap shaba ma» degen sóz bar. Bul rette baqtaryń da kelissin, baptaryń da kelissin. Dástúrli án degenimiz – qazaqtyń qazaqtyǵyn, ulttyq sıpatyn aıqyndaıtyn erekshe óner. Munda ánge jany ashıtyn, ánniń qadirin túsinetin adamdar jınalǵan. Bul qazaqtyń tektiligin tanytatyn bekzat óner», – dep qatysýshylarǵa sáttilik tiledi. Sonymen elimizdiń ulyq merekesi – Táýelsizdigimizdiń 20 jyl­dy­ǵy aıasynda uıymdastyrylǵan dástúrli oryndaýshylardyń VIII respýblıkalyq konkýrsyna qaty­sý­shylar Ámire Qashaýbaevtyń oryndaýyndaǵy «Qorlan», «Bal­qadısha», «Dýdar-aı», «Aq sısa», «Qos baraban», «Kókarshyn», «Baıan­aýyl», «Smet», «Bes qara­ger» sııaqty 22 ándi úsh kezeńde kókke órletti. Nátıjesinde 38 qatysýshynyń jartysyna jýy­ǵy ǵana keıingi kezeńge qatysý múmkindigine ıe boldy. Kelesi kúngi saıys – Syr nemese Qazyǵurt óńirindegi áýender men Qazaqstan kompozıtorlary án­deriniń oryndalýymen erekshelene tústi. Birinshi kezeńnen ótip, barynsha ysylǵan saıys­kerler bul kúni erekshe qarqynmen óner kórsetti. Al sońǵy kezeńde Ámire Qashaýbaevtyń repertýaryn­daǵy án retinde jigitter qaýy­my mindetti túrde «Aǵash aıaq», qyzdar «Ardaq» ánin oryndaý kerek bolatyn. Sondaı-aq, bul kezeńde de halyq ánderi oryn­daldy. Sóıtip, saıystyń qory­tyn­dy kezeńi de kelip jetti. Kóp uzamaı Ámire Qashaýbaev atyndaǵy dástúrli oryndaýshy­lardyń VIII respýblıkalyq kon­kýrsynyń jeńimpazdary da belgili boldy. Iаǵnı, caıys qory­tyndysyna sáıkes, Qazaq ult­tyq óner ýnıversıtetiniń birinshi kýrs stýdenti Qaırat Baı­bosynovtyń shákirti Sy­rym Muhametjanovqa Ámire Qashaý­baev atyndaǵy dástúrli oryn­daý­shylardyń VIII respýb­lı­kalyq konkýrsynyń birinshi júldesi berildi. Budan keıin qazylar alqasynyń tóraǵasy Bekbolat Tileýhan sóz kezegin alyp: «Kon­kýrsqa mektep ja­syn­daǵy 10 synyp oqýshylary­nyń qatysýy – Ámire Qashaý­baev atyndaǵy respýblıkalyq saıystardyń ta­rıhynda bol­ma­ǵan. Bul jolǵy saıys sony­symen de erekshelendi. Áıtse de bas júldege laıyqty saıys­kerdi kóre almadyq, – deı kele, ekinshi júldeli oryndy Erke­bulan Qasymov pen Gúldana Noǵaıbaevaǵa berse, úshinshi oryn­dy Allajar Qaıbar, Sát­tiǵalı Nurdáýletov jáne Sanat Isaev qanjyǵasyna baıla­dy. Al «Úkili úmit» nomına­sııasynyń júldesin Ádilet Ismaıl, Tal­ǵat Moldaǵalıev, Orazáli Jańa­baevtar ıemdense, Aıbek Sahaba, Jaqsygeldi Maıasarov, Nur­bolat Arzamas, Ar­daq Muqyshev, Janqoja Aıapovtar dıplomdarmen marapat­taldy. Kesh sońy qazylar alqasy men konkýrs laýreattarynyń gala-konsertine jalǵasty. Juldyz BAIDILDA. ___________________ Sýretterdi túsirgen Aǵybaı AIаPBERGENOV.