Elbasy tapsyrmasyna sáıkes QR Premer-mınıstriniń orynbasary – Aýyl sharýashylyǵy mınıstri Asqar Myrzahmetov bastaǵan Qazaqstan delegasııasy Izraıl Memleketine jumys saparymen bardy.
Delegasııa quramynda memlekettik organ, «Atameken» UKP, Ulttyq agrarlyq ǵylymı-bilim berý ortalyǵy jáne «QazaqstanInjınırıng», «Azyq-túlik kelisim shart korporasııasy» ulttyq kompanııalarynyń ókilderi bar.
Jumys saparynyń basty maqsaty – Memleket basshysy N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýyndaǵy AО́K-ke shetelden ınvestısııa tartý boıynsha bergen tapsyrmalaryn júzege asyrý jáne eki jaqty tıimdi kelisimderge qol jetkizý.
A.Myrzahmetov Izraıl Memleketiniń aýyl sharýashylyǵy jáne aýyldyq aýmaqtardy damytý mınıstri, Knessettegi «Evreı úıi» partııasynyń depýtaty Ýrı Arıelmen kezdesti.
Kezdesý barysynda eki el arasyndaǵy kelisimge sáıkes 2017-2018 jyldarǵa arnalǵan aýyl sharýashylyǵy salasynda yntymaqtasý boıynsha Jol kartasyna qol qoıdy.
Budan bólek, Qazaqstan aýmaǵynda kommersııalyq negizdegi demonstrasııalyq fermalar qurý boıynsha Deklarasııaǵa qol qoıylyp, olardyń kesheninde aýyl sharýashylyǵynyń ár alýan baǵyttary boıynsha tehnologııalardy tanystyrý talqylanady.
Sondaı-aq, delegasııa músheleri aýyl sharýashylyǵy salasyndaǵy jańa tehnologııalarmen aınalysatyn «Volcani center» ǵylymı-zertteý ınstıtýtyna bardy. Munda birikken zertteýler men jas mamandardy daıarlaý máseleleri qaraldy.
Izraıl – balǵyn ónimderdi syrtqa shyǵaratyn iri eksporttaýshylardyń biri jáne aýyl sharýashylyǵy salasy boıynsha álemdik kóshbasshy bolyp tabylady.
Investısııa tartý jáne otandyq ónimderdi eksporttaý úshin «dóńgelek ústel» formatynda ızraıldik agrobıznes ókilderimen kezdesý ótkizý de josparda bar.
Taǵy bir aıta keterlik jaıt, tájirıbe almasý úshin delegasııa músheleri «Granot» aýyl sharýashylyǵy kooperatıvi men Sý resýrstaryn únemdeý jáne basqarý kompanııasy jumysymen tanysady.