Qaryz máselesi qyzý talqylandy

Depýtattar aldymen áýe keńis­tigin paıdalaný jáne avıasııa qyzmeti máseleleri týraly zań­namaǵa engizilgen túzetýlerdi bi­rin­shi oqylymda maquldady. Qujatty Investısııalar jáne damý mınıstri J.Qasymbek tanystyrdy. Zań jobasy aıasynda sheteldik tasymaldaý­shylardy tirkeý, kommersııalyq emes uıymdardy tartý jáne áýe kemelerin paıdalanýshylardyń, aero­navıgasııalyq qyzmet kórsetý­shilerdiń, avıasııalyq oqý orta­lyq­tarynyń qyzmetin qadaǵalaý jó­nin­degi azamattyq avıasııa sala­syn­da­ǵy ýákiletti organnyń quzyreti naq­tylanady jáne tolyqtyrylady. 

«Sonymen qatar, avıasııa qyz­met­kerlerin medısınalyq kýá­lan­dyrý júıesin jetildirý men avıa­sııalyq medısınalyq ortalyq­tardy sertıfıkattaýdyń jańa túri usynylady. Sondaı-aq, shaǵyn avıa­­sııany  damytý, ushqyshsyz ushatyn apparat­tar­dy esepke alý, arnaýly ushýǵa ruqsat alý, áýe kemelerin paıda­lanýshylarǵa jalǵa berý isinde ákimshilik kedergilerdi joıý­ǵa qatysty erejeler júıesin engi­zý de kózdeledi», – dedi J.Qasym­bek.

Sena­tor S.Eń­segenov qujat aza­mat­tyq avıa­sııa men áýe keńisti­gin paı­dalaný salasyndaǵy zańna­ma­ny jetildirýdi jáne ony Ha­lyq­aralyq azamattyq avıasııa uıy­my (IKAO) standarttaryna sáı­kes­tendirýdi retteıtindigin atap ótti.

«Qazirgi kezde Qazaqstandaǵy 20 áýe kompanııasynyń «Eır As­ta­na» qurylymynan basqa 19-yna Eý­roodaq elderiniń áýe keńistigine ushýǵa tyıym salynǵan. Zań joba­syndaǵy áýe qaýipsizdigin basqarý jáne baqylaý júıelerin jetildirý erejeleri otandyq áýe kompanııalary úshin engizilgen shekteýlerdi azaıtýǵa múmkindik beredi. So­nymen birge, sha­ǵyn avıasııany da­mytýdy qol­daý maqsatynda zań jobasynda jeńil jáne tym jeńil áýe kemeleri ushýlar oryndaǵan jaǵ­daıda olarǵa aeronavıgasııalyq qyzmet kórsetýdi óteýsiz júzege asyrý jónindegi to­lyq­tyrýlar engi­zilgen», – dedi S.Eń­segenov.

Sonymen, bul atalǵan zań jobasy birinshi oqylymda maquldandy.

Budan keıin «Kollektorlyq qyzmet týraly» zań jobasy men «Qazaqstan Respýblıkasynyń keıbir zańnamalyq aktilerine kollektorlyq qyzmet máseleleri boıynsha ózgerister men tolyq­tyrýlar engizý týraly» ilespe zań jobasy talqylaýǵa shyǵaryldy. Atalǵan máselelerge baılanysty Ulttyq bank tóraǵasy Danııar Aqyshev baıandama jasady.

Bul zań jobalaryna sáıkes kol­lektorlyq qyzmet agenttik pen boryshker arasyndaǵy bereshekti óndirip alý týraly kelisimshart taraptardyń quqyqtary men mindettemeleri, boryshkerdiń málimetteri, boryshtyń kólemi men qurylymy, shart boıynsha syıaqy mólsheri men basqa da máseleler jónindegi eleýli sharttar negizinde júzege asyrylady. Sondaı-aq, boryshkerdiń bereshegin birneshe kollektorlyq agenttikke berýge de tyıym salý kózdelip otyr.

Zań jobasy boıynsha negizgi baıandama aıaqtalǵan soń, senatorlar arasynda qyzý pikirsaıys órbidi. О́z kezeginde Qasym-Jomart Toqaev jurtshylyq arasynda pikirtalas týǵyzǵan asa qajetti máselege Ulttyq bank basshysynyń nazaryn aýdardy.

«Mıllıonnan astam boryshker, ýaqtyly qaıtarylmaǵan birjarym trıllıon teńge qaryz qazirgi bank júıesiniń jaǵdaıyn kórsetip otyr. Otandyq bank júıesin taıaýda ǵana álemdegi eń úzdik bank júıesiniń biri degen bolatynsyz. Al qazir osy bank júıesin bárimiz jabylyp qutqaryp, ınstıtýt retinde kollektorlardy engizip jatyrmyz», – dedi Q.Toqaev.

Talqylaýda senator O. Pere­pe­chına: «Memleket birese bankti, birese boryshkerdi qoldap, bul úderiske qatysýshyny udaıy «shuńqyrdan» shyǵaryp ala bermeıdi. Elimizdiń ekonomıkalyq damýy men bizdiń azamattarymyzdyń ál-aýqaty bank júıesiniń turaqtylyǵyna baılanysty bolǵandyqtan ekinshi deńgeıdegi bankterge talaptardy kúsheıtý kerek», – dedi. Sol sııaqty depýtat E.Muqaev ta zań jobasynyń tikeleı áser ete­tin erejeleri qarjy qyzmetin tuty­ný­shy­lardyń quqyqtaryn qorǵaý men kol­lektorlyq agenttikter­diń qyz­metin qatań retteý kózdeletindigin tilge tıek etti.

Zań jobasyn talqylaý barysynda boryshkerdiń, nesıe berýshiniń jáne nesıe berýshige deldaldyq qyzmet kórsetetin kollektorlyq agenttiktiń múddeler tepe-teńdigin belgileý maqsatynda kollektorlyq agenttiktiń óz bastamasy boıynsha jumys kúnderi aptasyna úsh ret 8:00-den 21:00 aralyǵynda bir márte jeke baılanys kezeńin qarastyrý usynyldy.

Zań jobasyndaǵy baptar ara­syndaǵy ishki qaıshylyqtardy joıý maqsatynda boryshker men jeke tulǵanyń quqyqtaryn belgileýge qatysty birneshe ózgeris engizildi. Sóıtip, kollektorlyq qyzmet máse­leleri jónindegi zańnamaǵa túze­týler eki oqylymda qaralyp, tal­qy­laý nátıjesinde Senat komı­te­tt­eriniń eskertpeleri men usynys­tary negizge alynyp, zań jobasyna túzetýler engizildi. Zań jobalary Májiliske jetildirilýge jiberildi.

Nurlybek DOSYBAI,

«Egemen Qazaqstan»