Jıynda OQO TJ departamentiniń bastyǵy Nurbolat Derbisov oblys kóleminde sý tasqyndarynyń aldyn alý maqsatynda atqarylyp jatqan jumystar men qalyptasyp otyrǵan jaǵdaılar jóninde baıandady. Onyń aıtýynsha, búgingi tańda oblys kólemindegi 43 sý qoımasynyń toǵyzy 100 paıyzǵa tolyp, tranzıttik rejımge kóshirilgen. Sý tasqynynyń aldyn alý jáne onyń saldaryn joıý úshin tıisti jumystar bastalyp, júıeli júrgizilip jatqanyn jetkizgen Nurbolat Bekbolatuly sý qoımalarda qaýipsiz rejımdi saqtaý barynsha kúsheıtilgenin alǵa tartty.
«Máselen, Jambyl oblysynda jaýǵan qatty jaýyn-shashyn men taýdaǵy qardyń erýi saldarynan 30 naýryzda Jýaly aýdanynan bastaý alatyn Boraldaı ózeniniń sýy 375 sm-ge kóterilip, Boraldaı eldi mekeniniń tusynda aǵysy sekýndyna 250 tekshe metrdi quraǵan. Jergilikti ákimdik pen polısııa, órt sóndirý bólimderiniń qyzmetkerleri turǵyndarmen birigip qorǵanys dambalarynyń osal jerlerin kóterip, nyǵaıtyp, táýlik boıy qaýipti jerlerge kezekshilik uıymdastyrdy. Sonyń arqasynda biz úlken tasqyn sýdy ótkizip, Túlkibas aýdanyndaǵy birneshe eldi mekenderdi sý basýdan qorǵadyq», – dedi N.Derbisov.
Boraldaı ózeniniń tasqyn sýy 31 naýryz kúni Arys ózenine qosylyp, sýdyń aǵysy sekýndyna 243 tekshe metrge jetken. Onyń saldarynan Ordabasy aýdany aýmaǵynda «Batys Evropa – Batys Qytaı» tas jolynyń 2226 shaqyrymyndaǵy Arys ózeniniń qashyrtqy kanalynyń kópiri opyrylyp qulaǵan. Tótenshe jaǵdaılardyń aldyn alý maqsatynda oblystyq TJB qyzmetkerleri jolǵa ýaqytsha shekteý qoıyp, qatynas Ordabasy aýdanynyń Temirlan eldi mekenindegi jol arqyly júrgizilgen. Osyǵan baılanysty ózen arnalarynda qajetti sharalar atqarylýda, barlyq ózen sýlary men sý qoımalarynda monıtorıng júrgizilýde.
Jıyn barysynda jaǵdaılardyń jaı japsaryn muhııat tyńdaǵan oblys ákiminiń orynbasary óńirde bolýy múmkin tasqyn sýdyń aldyn alý boıynsha sharalardy tyńǵylyqty oryndaýdy júktedi.
«О́ńirdegi kóktemgi sý tasqynynyń erekshelikterin eskere otyryp, oǵan jan-jaqty daıyndalmasa bolmaıdy. Qala jáne aýdanǵa qarasty aýmaqtarda sý basý qaýpti joǵary jerlerde únemi vızýaldy zertteý jumystaryn júrgizý kerek. Sý qashyrtqy kanaldar men aryqtardy qoqystardan tazalap, sý ótkizý qabiletin joǵarylatýdy jáne sý qoımalarynda qaýipsiz rejımdi saqtaýdy basty negizge alý shart», – dedi aımaq basshysynyń orynbasary.
Jıyndy qorytyndylaǵan ol tıisti mekeme basshylaryna, sondaı-aq aýdan ákimderine kóktemgi sý tasqynyna baılanysty jaǵdaıdy kúnbe-kún baqylap, monıtorıng jasap, barlyq qajetti sharalardy qolǵa alýdy tapsyrdy.