2017 jyldyń basynda jasalǵan saýalnamalyq zertteýge 10,05 myń sheteldik týrıst qatysty. Olardyń 53%-y er adamdar bolsa, 47%-y áıelder. 24,5%-y iskerlik maqsatta nemese jumys babymen, al qalǵan 75,5%-y jeke bas sebepterimen Qazaqstanǵa at basyn tiregen. Salystyrý úshin aıta keteıik, bir jyl buryn iskerlik maqsatta jáne jumys babymen kelgenderdiń úles salmaǵy 21,3% bolǵan edi.
Al olardyń jumsaǵan qarjysyn esepter bolsaq, bıznes-týrısterdiń Qazaqstanda jumsaǵan aqshasy jalpy sheteldik týrıster shyǵynynyń 42,1%-yn qurady. Al bir jyl buryn bul kórsetkish 40,2%, ıaǵnı 408,9 mln teńge bolǵan-dy.
Sheteldik týrıstiń jumsaıtyn aqshasy orta eseppen 96,7 myń teńgeni qurady. Bul bir jyl burynǵy kórsetkishten 22%-ǵa artyq.
Al bıznes-týrısterdiń jumsaıtyn aqshasy jeke sharýamen kelýshiler jumsaıtyn qarjyǵa qaraǵanda 2,2 ese artyq bolyp shyqty. Naqtyraq aıtar bolsaq, iskerlik maqsatta jáne jumys babymen kelýshiler orta eseppen 165,8 myń teńge jumsasa, jeke bas sebepterimen kelýshiler Qazaqstanda 74,3 myń teńge jumsaıdy eken.
Jalpy, QR Ulttyq qaýipsizdik komıtetiniń Shekara qyzmetiniń málimetinshe, ótken jyly Qazaqstanǵa 6,5 mln sheteldik qonaq kelgen. Bul aldyńǵy jylǵy kórsetkishten 1,2%-ǵa artyq. Sheteldik týrısterdiń kelý qarqyny osy kúıinde saqtalatyn bolsa, 2017 jyly Qazaqstanǵa keminde 6,6 mln týrıst kelip, olar el ekonomıkasyna 637,5 mlrd teńge kirgizbek.
Saýalnama nátıjesi kórsetkendeı, Qazaqstandaǵy sheteldik týrısterdiń eń kóp qarjy jumsaıtyny halyqaralyq baǵyttaǵy kólik shyǵyndary bolyp shyqty. Jalpy jumsalatyn qarjynyń 33,4%-y osy sektorǵa tıesili.
Odan keıingi orynda taýar satyp alý. Sonyń ishinde 24,4%-y kádesyıǵa, 23,8%-y kıim men aıaq kıimge, taǵy 22,9%-y asyl tastar men metalldar, antıkvarıat pen kórkemóner týyndylaryn satyp alýǵa jumsalatyn kórinedi.
Al úshinshi orynda tamaq satyp alýǵa jumsalatyn aqsha. Týrısterdiń qaldyratyn qarjynyń 16,2%-y tamaqtanýǵa ketedi eken.
Sheteldik týrısterdiń tek 1,7%-y ǵana Qazaqstanǵa bir kúnge keletin bolsa, qalǵandary eki nemese odan da kóp kúnge keledi.
Týrısterdiń 54,5%-y tanystary men týystaryna tússe, 26,8-y qonaqúıge, 12,8%-y jaldamaly páterge, taǵy 2,1%-y shıpajaılarǵa ornalasqan.
Daıyndaǵan Baýyrjan Muqanov, «Egemen Qazaqstan»