Júıeli jumys jemisin beredi

Jekeshelenetin uıymdar tizbesi naqtylandy

Jıynda jekeshelendirý jaıynda Ulttyq ekonomıka mınıstri Tımýr Súleımenov baıandady. Mınıstrdiń málimdeýinshe, bıyl – 280 uıym, al kelesi jyly 84 uıym satýǵa shyǵarylady. «Eır Astana» AQ, «Qazatomónerkásip» UAK AQ, «Qazaqtelekom» AQ, «QazMunaıGaz» UK» AQ, «Qaz­poshta» AQ, «Samuryq-Energo» AQ, «Qazaqstan temir joly» UK» AQ, «TaýKen Samuryq» UK» AQ tárizdi elimizdiń 8 iri aktıvin IPO/SPO-ǵa 2019-2020 jyldary shyǵarý josparlanǵan.

2016 jyldyń sońynda júrgizilgen vedomstvoǵa baǵy­nysh­ty uıymdardy túgendeýdiń qory­tyndysy boıynsha Keshen­di jekeshelendirý jospary­na qosymsha 105 uıym men qyzmet­terin memlekettiń qatysýy­men jáne onymen úlestes tulǵa­larmen AQ jáne JShS atqara alatyn, Úkimettiń qyzmet túrlerin aıqyndaıtyn qaýlysyna saı kelmeıtin 32 uıym engizilgen.

«Nysandar tizimin jasaǵanda biz túgendeý nátıjelerin negizge aldyq, oǵan sáıkes memleket menshiginde 6003 uıymdy saqtap qalý usynyldy, onyń ishinde 88 paıyzdan astamy áleýmettik sala uıymy bolsa, 447 kompanııa – kvazımemlekettik sektordan, sonymen qosa 243 uıymdy taratý usynyldy», dedi T.Súleımenov.

Mınıstrdiń aıtýynsha, jeke­shelendirýdiń ashyqtyǵy men tıim­diligin qamtamasyz etý, áleýetti ınvestorlardy barynsha kóp tartý maqsatynda «KAZNEX INVEST» AQ qosymsha ınternet-resýrsyn ashqan. Munda jekeshelendiriletin nysandar jónindegi aqparattar usynylǵan jáne keshendi jekeshelendirý jos­pary oryndalýynyń júzege asyrylý barysy jarııalanýda.

2016 jyldan bastap Jeke­she­lendirýdiń keshendik jospary boıynsha 51 mlrd teńge somasyna 198 nysan, sonyń ishinde 7 mlrd teńgege respýblıkalyq men­shiktiń 18 nysany, 5 mlrd teńge­ge kommýnaldyq menshiktegi 95 nysan, 39 mlrd teńgege kvazımem­lekettik sektordyń 85 nysany ótkizildi.

Al Qarjy mınıstri Baqyt Sultanovtyń habarlaýynsha, Mem­leket basshysynyń tap­syr­ma­laryn iske asyrý aıasynda 2017 jyly 325 nysandy satý josparlanǵan, sonyń ishinde res­pýb­lıkalyq menshiktiń 30 nysany, kommýnaldyq menshiktiń 177 nysany, Ulttyq holdıngterdiń 67 nysany men Áleýmettik-kásipkerlik korporasııalardyń 51 nysany bar. 2018 jyly 61 nysandy satý kózdelgen.

«2017 jyly 29 tartymdy nysandy satý josparlanǵan, onyń ishinde – «Samuryq-Qazyna» UÁQ» AQ-qa qatysty 20 nysan, «Báıterek» UBH» AQ-qa qatys­ty 1 jáne respýblıkalyq menshik­tegi 8 nysan bar. Al 2018 jyl­ǵa josparlanǵan 21 tartym­dy nysannyń bireýi kommý­naldyq menshikke, 10 «Samu­ryq-Qazyna» UÁQ» AQ-qa, 3 «Báı­terek» UBH» AQ-qa, 3 «Qaz­Agro» UBH» AQ-qa jáne 4-eýi res­pýb­lıkalyq menshikke tıesili», dedi B.Sultanov. Son­daı-aq, «Sa­muryq-Qazyna» UÁQ» AQ-tyń 18 iri kompanııasyn ótkizý 2019-2020 jyldarǵa jospar­lanǵan.

Másele jan-jaqty talqy­lanǵan soń Premer-Mınıstr Ba­qyt­jan Saǵyntaev Qazaqstan­daǵy jekeshelendirý baǵdarla­masyn odan ári iske asyrý boıynsha birqatar tapsyrmalar berdi.

Úkimet basshysy jeke­she­len­dirý nysandaryn ótkizýdiń jańa kesteleri qaıta bekitilgenin, sondaı-aq ár nysan boıynsha Jol kartalary olardy ótki­zý­diń naqty merzimderimen Mem­lekettik múlik tizilimine engi­zilgenin atap ótti. Osyǵan baı­lanysty memlekettik organ­darǵa jáne holdıngterge beki­tilgen kestelerdi naqty saqtaý­dy qamtamasyz etý qajet. Son­daı-aq, búginde memlekettik menshikte qalýy tıis nysandar tizimin jasaý boıynsha jumys júrgizilýde. Oǵan qosa, «Yellow Pages» qaǵıdalaryna sáıkes kelmeıtin júzden astam nysan jekeshelendirýge jatatyn nysandar tizimine qosymsha engiziledi. Memlekettik menshiktegi qalǵan nysandar jabylýy nemese qaıta uıymdastyrylýy tıis. Osyǵan baılanysty Premer-Mınıstr memlekettik organdarǵa, ákimdik­terge jáne ulttyq holdıngterge aǵymdaǵy jyldyń sońyna deıin atalǵan jumysty aıaqtaýdy tapsyrdy. Budan ózge, Baqytjan Sa­ǵyntaev Úkimettiń keńeıtilgen oty­rysynda Memleket basshysy memlekettik qatysýy bar bar­lyq nysandardy olardy báse­keli ortaǵa berý maqsatynda túgen­deýdi tapsyrǵanyn eske saldy.

Ulttyq ekonomıka mınıstr­ligi júrgizgen jumys qory­tyn­dysy boıynsha básekeli ortaǵa berýge tıisti nysandardyń tizimi ózektendirildi. Sol sebepti jaýapty memlekettik organdar alda osy baǵyttaǵy jumystardy baqylaýda ustaýlary qajet.

48 myńnan astam adam jumyspen qamtyldy

Otyrysta talqylanǵan ekinshi másele boıynsha Eńbek jáne halyqty áleýmettik qorǵaý mınıstri Tamara Dúısenova baıan­dady. 2017 jyldan bastap eli­mizde qajetti kásipter men kásip­kerlik negizderi daǵdylary­na jappaı oqytý men úıre­týdi, nesıelendirý arqyly jap­paı kásipkerlik úshin jaǵdaılar tý­dyrýdy, jumysqa ornalasty­rýǵa yqpal etý jáne eńbekke jumyl­dyrýdy qoldaýdy qarastyratyn О́nimdi jumyspen qamtý jáne jappaı kásipkerlikti damytý baǵdarlamasy júzege asyrylýda.

«5 sáýirdegi jaǵdaı boıynsha baǵdarlamaǵa 80 myń adam qa­tysty, onyń ishinde 75 myń (94 paıyz) jumyssyzdar, ózin-ózi jumyspen qamtyǵandar – 5 myń (6 paıyz). Baǵdarlamany júzege asyrý aıasynda 48 myńnan astam adam jumysqa ornalastyryldy. Taǵy 31 myń adam jumyspen qam­tý ortalyqtary arqyly jumys berýshilermen bos jumys oryn­daryna jumysqa ornalastyryl­dy», dedi T. Dúısenova.

Baǵdarlamanyń ekinshi baǵy­tyn júzege asyrý úshin bıyl 38,5 mlrd teńge qarastyrylǵan. Bıyl 5,8 myń shaǵyn nesıe berip, kásipkerlik negizderine 15 myń adamdy oqytý josparlanǵan. Úshinshi baǵyt aıasynda áleýmet­tik jumys oryndaryna 11,3 myń adamdy ornalastyrý jos­par­lanǵan, jastar is-tájirıbesine – 12,7 myń túlek, qoǵamdyq jumystarǵa 76,2 myń adam tartylady. 2,8 myń adamnyń kóshi-qonyna sýbsıdııa tóleý qarastyrylǵan. Baǵdarlamanyń úshinshi baǵytyn júzege asyrýǵa 9 mlrd teńge bólingen.

«Jyl basynan beri áleý­met­tik jumys oryndaryna 12,4 myń adam ornalastyryldy, 28,1 myńnan astam qazaqstandyq qoǵamdyq jumystarǵa jiberildi, 7,6 myń jas maman jastar is-tájirıbesine qam­tyldy. Jalpy, baǵdarlamany júze­ge asyrýǵa 2017 jyly 85,3 mlrd teńge qa­ras­tyrylǵan», dedi mınıstr.

Al Bilim jáne ǵylym mınıstri Erlan Saǵadıev bıyl kadrlar daıarlaýmen 21,3 myń adamdy jáne kýrstyq oqytýmen 26 myń adamdy qamtý josparlanǵanyn jetkizdi. О́ńirlerde kadrlar daıarlaýǵa úmitkerler tizimin qalyp­­tastyrý boıynsha 825 utqyr top quryldy. Úmitkerler 9-11 sy­nyp­tar túlekterinen, bilik­tiligi joq tulǵalardan, az qam­tyl­ǵan otbasylardan shyqqan­dardan jáne ómirde qıyn jaǵ­daıǵa tap bolǵandardan, sondaı-aq, azamattardyń basqa da sanattarynan qalyptastyrylady. 360 bilim berý uıymynyń tizimi anyqtalǵan. Jumyspen qamtý ortalyqtary quramdy 29 jasqa deıingi jastardan, halyqty jumyspen qamtý ortalyqtaryna tirkelýine táýelsiz jumyssyzdardan jáne ózin-ózi jumyspen qamtyǵandardan qalyptastyrylady. Bes pılottyq óńirde shalǵaı eldi mekenderde azamattardy oqytý úshin utqyr oqý ortalyqtaryn qurý boıynsha jumys júzege asyrylady.

Dınara BITIKOVA,

«Egemen Qazaqstan»