Qazaqstandyq ánshi Dımash Qudaıbergen «Singer2017» án baıqaýynyń birinshi kezeńinde kıgen sahnalyq kıimi 158 890 ıýanǵa (7,2 mıllıon teńge) satyldy, dep habarlaıdy QazAqparat.
Kıim qytaılyq mpaimai.jd.com ǵalamtor saýda jelisinde aýksıonǵa shyǵarylǵan. Bastapqy baǵasy 188 ıýannan (8 500 teńge) bastalǵan kıimdi satyp alýǵa 19 640 adam qatysyp, 32 adam baǵa kótergen.
Qorytyndysynda kıim 158 890 ıýanǵa satylyp, jeńimpazǵa Iphone 6S telefony syıǵa tartylǵan.
Mpaimai.jd.com saıtynyń habarlaýynsha, kıimdi Dımash 27 naýryz kúni Shanhaı qalasyndaǵy 24-kezekti «China Top music Awards» sharasy kezinde atalmysh saıtqa tartý etken. Al saıt ataqty ánshiniń kıimin satýdan túsken qarajatty Qytaıdaǵy balalar qoryna aýdaryp, kómekke zárý balalarǵa jumsamaq.