Mamandardyń málimetinshe, kórme kesheninen ońtústik baǵytqa qaraı jeke kólik ıelerine arnalǵan eki park salynýda. Syıymdylyǵy – 9500 oryn. Qonaqtardyń kórmede bolý ýaqyty ortasha eseppen 7 saǵatty qurasa, keptelis kezinde kólikterdiń deni sonda qoıylady dep boljanýda. Al múmkindigi shekteýli jandar úshin kireberisterdiń dál janynan turaq oryndary belgilenedi. Olardyń sany jalpy orynnyń 0,5-1 paıyzyn quramaq.
VIP-meımandarǵa arnalǵan kireberiste jáne uıymdastyrýshylar keńsesi janynda shamamen 16800 sharshy metr jer asty turaǵy bolady. Aıta keteıik, Kongress-ortalyqta VIP-qabyldaýlar, baspasóz máslıhattary ótkiziledi ári uıymdastyrýshylardyń keńsesi ornalasqan. Turaq 480 orynǵa laıyqtalǵandyqtan, VIP-meımandarǵa, BAQ ókilderine jáne kompanııa qyzmetkerleri úshin jetkilikti bolmaq. Kórme ótetin úsh aı ishinde shamamen 61000 VIP-meımandy qabyldaý úshin 500 kólikke arnalǵan turaq qajet. Bul barlyq kútiletin kelýshilerdiń 1,2 paıyzyn quramaq.
Qarbalas kúnderi júrgizýshiler kólikterin jaqyn mańdaǵy aýdandarǵa qoıýy ábden múmkin. Bul jaǵdaıda EKSPO-2017 aýmaǵy aınalasyndaǵy turǵylyqty oramdar 2000 kólikke deıin qabyldaı alady. Kórme ótetin ýaqyt aralyǵynda barlyq qatysýshylardyń keminde 1 paıyzy irgeles kólik qoıý oryndaryn paıdalanýǵa múmkindikteri bar. Eń aýqymdy joba – keńse qyzmetkerlerine arnalǵan turaqtar. Olardyń sany – úsheý. Uıymdastyrýshylar qataryndaǵy 5675 qyzmetker eki aýysymda eńbek etedi. Oryndardyń teń jartysy aýysym ózgergen kezde bos bolýy qajet. Sondyqtan, turaqqa usynylatyn oryndar shamamen keńse qyzmetkerleriniń 42 paıyzyn qamtamasyz etedi. Al EKSPO-qalashyqta turatyn azamattar, ıaǵnı kórmege qatysýshylar jaıaý qatynaıdy dep boljanýda. Basqa qyzmetkerler qoǵamdyq kóliktiń múmkindigin paıdalanǵany durys. Quqyq qorǵaý organdarynyń 200 qyzmetkeri patrýl kólikterin naqty qajettilikterge qaraı turaqqa qoıatyn bolady.
Ashat RAIQUL, «Egemen Qazaqstan»