Osynsha qyzmetiniń bárin «ánshi» degen bir aýyz sózge syıdyrǵan Erlannyń esimi qalyń qaýymǵa ulttyq mýzyka óneriniń úlken janashyry retinde tanylǵany ras. Ulttyq mýzyka mádenıetinde erekshe oryn alatyn Arqa mektebindegi án úlgisiniń negizin qalaǵan Úkili Ybyraı, Birjan sal, Aqan seri, Jaıaý Musa sekildi halyq kompozıtorlarynyń ánderin sahnada úsh saǵatqa jýyq tamyljytqanymen qoımaı, ár ánniń tarıhyn áńgimemen órip, óreli tanymymen eldi tamsantty. Ulttyń án qaınarynyń bastaý-bulaǵyna sapar shekkize otyryp, basynan talaı qasiretti ótkizgen halyq tarıhyna uqsas án óneriniń de zobalań taǵdyry týraly áńgimeler zaldaǵy úlken-kishini túgel tebirentti. Sáken Seıfýllın, Ilıa Jaqanov, Aqseleý Seıdimbek, Kákimbek Salyqov, Murathan Eginbaev syndy kompozıtorlardyń ánderin kezeń-kezeńine saı kezegimen shyrqady.
Almaty tórinde alǵash ret jeke shyǵarmashylyq keshin uıymdastyryp otyrǵan Erlan Tóleýtaıdyń elýge kelip, el aldyna shyǵyp bergen esebinen ýaqytynyń izdenispen ótip kele jatqanyna, án taǵdyryna jaýapkershilikpen qaraıtynyna kýá boldyq. Qazaqtyń dalasy sııaqty jazylyp jatqan keń tynysty únimen, tereńnen tolǵap shyrqaıtyn Erlannyń oryndaýyndaǵy «Ardaq», «Qarakesek», «Sholpan», «Estaıdyń Qorlany», «Taý ishinde» sekildi ánder ózinshe árlenip, óńdele túskeni ańǵaryldy.
Shyǵarmashylyq keshte Merýert Túsipbaeva, Roza Álqoja, Seıil Aıaǵan syndy qazaq estradasynyń belgili ánshileri Erlan Tóleýtaıdyń ánderin oryndady. Jaıaý Musa men Imanjúsip, Aqan seri men Jarylǵapberdiler halyqpen qany-jany aralasyp, múddesin ashynyp qalaı qorǵasa, búgingi qoǵamnyń shyndyǵy Erlannyń da qalamynan sher-shemen bolyp tógilip, kórkemsóz oqý sheberleriniń oryndaýynda birinen soń biri oqylyp, onyń aqyndyǵy ánshiliginen bólip-jaryp qaraýǵa kelmeıtin birtutas dúnıe ekenin baıqatty.
Sal-serilerdiń muraty ulttyq án ónerin saqtaýshy, óristetýshi, burynǵy jáne qazirgi dáýirdiń arasyn jalǵastyrýshy bolsa, dáýlesker dombyrashy, arqaly ánshi Erlan Tóleýtaı tabıǵı taza talantymen sol jaqsylardyń jurnaǵy ekenin tanytty. Án qazynasyn kirpik qaqpaı kúzetýdi ǵana qyzmetim dep bilip, halyq murasyna qylaý túsirmeı kele jatqan eńbegin kórermeni de rızashylyqpen baǵalap, tik turyp qol soqty.
Aıgúl AHANBAIQYZY, «Egemen Qazaqstan» ALMATY