Osy tileýdiń ózi meniń ózime de kúsh-qýat beredi: pesh túbinen julyp alyp, kúres kileminiń tórine dedektetip alyp barady. Sol kudiretti kúsh kúni búginge deıin meni tuǵyrdan túsirmeı, balýan baptatyp júr!
Osy aıtqanymnyń barlyǵy da ishimde qalar ma edi, eger, keshe el gazeti «Egemen Qazaqstannan» Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» degen maqalasyn oqymaǵanymda...
Ásirese, «Jańǵyrý ataýly burynǵydaı tarıhı tájirıbe men ulttyq dástúrlerge shekeden qaramaýǵa tıis. Kerisinshe, zamana synynan súrinbeı ótken ozyq dástúrlerdi tabysty jańǵyrýdyń mańyzdy alǵysharttaryna aınaldyra bilý qajet. Eger jańǵyrý eldiń ulttyq-rýhanı tamyrynan nár ala almasa, ol adasýǵa bastaıdy», degen joldar meniń janymdy dúr silkindirip, oıdaǵy aıtsam dep júrgen sózderdiń syrtqa shyǵýyna túrtki boldy.
Qarap tursam, bar sanaly ǵumyrymdy kıeli sport – kúres ónerine arnappyn. Qolymnan qazaǵymnyń júrekti de, bilekti talaı balasy ótti. Bir-birine múlde uqsamaıtyn minezder, birinen-biri asyp túsip jatqan dúdúlder men daryndar. Biraq, qudanyń qudireti, solardyń boıynda eriksiz tańdaı qaqtyratyn ortaq bir qasıet bolatyn. Jáne de men ony jazbaı tanıtynmyn. Ol – ulttyń jadylyq kodyna jazylyp qalǵan ór namys edi!
Mine, men jarty ǵasyrdan astam ýaqyt bapkerlik ǵumyrymda osy namys degen aldaspandy shama-sharqymsha qaırap kelemin. Sol aldaspan aǵaıyndy Baısholaqovtar bolyp, álemdik áıdik jarystarda jarqyrady. Tap búginde Shynkeevterdeı qazaq kúresiniń kóginde kún sáýlesine shaǵylysyp júr!
Iá, bárin aıt ta, birin aıt deıtin bolsaq, búgingi kúnde ulttyq tól sportymyz – tamyryna qan júgirgen Qazaq kúresi jandanyp, jańǵyryp keledi. Bile bilgen adamǵa osy kúresimizben birge sertke sýarylǵan kúresker rýh ta, qaısarlyqqa qaıralǵan ór namys ta qaıta oraldy emes pe?! Mine, ulttyq qundylyqtar turǵysynan alǵanda, tól kúresimizdiń tóńiregindegi bul jańǵyrýdy men shyn mánindegi ulttyq-rýhanı tamyrdan nár alǵan, namysty janyǵan jańǵyrý dep uǵamyn!
Dıhanbaı BITKО́ZOV,
Qazaqstan Respýblıkasynyń qurmetti sport qaıratkeri
QARAǴANDY