Bir qyzyǵy, sheberlik dárisi sıpatynda ótken kezdesýge uldar ǵana emes, kúrespen aınalysatyn qyzdar da kelipti. Jetkinshekterdiń barlyǵy derlik Almatydaǵy №15 balalar men jasóspirimder sport mektebinde grek-rım kúresimen tegin aınalysady.
Bul kezdesýdiń bastamashysy da áıgili balýandardyń ózderi eken. Sheberlik synybyna muryndyq bolyp júrgen Dáýlet Turlyhanovtyń oıynsha, bolashaq Olımpıada júldegerleri osy kezdesýdiń ortasynda otyrýy múmkin.
Sonymen, jas sportshylar áıgili balýandardyń árbir qımylyn qalt jibermeı qadaǵalap, qyzyǵa baqylady. Kásipqoı sportshylar kúres óneriniń qyr-syryn úıretip qana qoımaı, bolashaq chempıondardyń qate ádisterin túzep, olardy eptilikke baýlydy.
– Ataqty balýandar júrgizgen sheberlik synyby bárimizge unady. Olar bizge grek-rım kúresiniń túrli ádis-tásilderin úıretti. Men bul sport seksııasyna kelip júrgenime tórt-aq kún boldy. Sonyń ózinde azdap bolsa da shynyǵyp qaldym, – deıdi toǵyz jastaǵy Ernat Sabyrbekov.
Balýandarmen ótken kezdesýden keıin balalardyń barlyǵynyń da áseri osyndaı.
Bul balalarǵa qaraǵanda, bes jyldan beri kúrespen aınalysyp kele jatqan Marına Zakshevskaıa kádimgideı kásipqoı sportshy. Qazaqstannyń tórt dúrkin chempıony, eki dúrkin Azııa júldegeri jáne álem chempıonatynyń qola júldesin jeńip alǵan. Soǵan qaramastan, Marına da kúrestiń ózi buryn baıqamaǵan múlde basqa ádisterin kórgenin aıtady.
– Qazirgi kúnderi biz halyqaralyq jarystarǵa daıyndalyp júrmiz. Al bizdiń súıikti sportshymyz Dáýlet Turlyhanov ótkizgen sheberlik saǵattary bizge mindetti túrde kómektesedi, – deıdi Marına.
Eń bastysy, «Halyq Arena» munan bylaıǵy jerde ár 10 kún saıyn osyndaı sheberlik synyptaryn uıymdastyryp, oǵan Olımpıada chempıondaryn, álem jáne Eýropa chempıonattarynyń júldegerlerin, halyqaralyq týrnırlerdiń jeńimpazdaryn shaqyryp turmaq.
Kezdesý sońyna qaraı tanymal sportshylar balalarmen suhbattasyp, aqyl-keńesterin aıtyp, Azııa men Ýnıversıada taǵylymy jaıly baıandady. Sporttyń paıdasy týraly sóz qozǵady.
Aınash ESALI,
«Egemen Qazaqstan»
ALMATY