Kezdesý barysynda Memleket basshysy Ádilet mınıstrliginiń 2016 jylǵy qyzmeti týraly esebin tyńdap, aldaǵy jumys josparlarymen tanysty.
Qazaqstan Prezıdentine zań jobasyn jasaý jumystary josparynyń oryndalýy jóninde málimet berildi. Bul rette el Parlamentiniń qaraýyna 18 zań jobasy engizilgen. M.Beketaevtyń málimeti boıynsha, bıylǵy ekinshi toqsannan bastap 28 zań jobasyn usyný josparlanýda.
Elbasy memlekettik organ qyzmetiniń nátıjelerine oń baǵa berdi.
Osy oraıda Nursultan Nazarbaev Ádilet mınıstrligi aldynda turǵan, ulttyq zańnamany qalyptastyrýǵa belsene atsalysý, zańnamalyq jáne ózge de normatıvtik quqyqtyq aktilerge quqyqtyq saraptama men taldaý júrgizý, elimizdiń halyqaralyq arenadaǵy qyzmetin quqyqtyq turǵydan qamtamasyz etý jáne zııatkerlik menshik quqyǵyn qorǵaý sııaqty birqatar mańyzdy mindetterdi aıqyndady.
Ádilet mınıstri Memleket basshysyna zań shyǵarý jáne úılestirý jumysy, ashyq formattaǵy zań shyǵarý jumystary jónindegi vedomstvoaralyq komıssııa qyzmeti týraly baıandady. Atap aıtqanda, bul vedomstvoaralyq komıssııa jumysynyń úderisin jýrnalısterge onlaın rejiminde baqylaýǵa, sondaı-aq otyrystardyń qorytyndysy boıynsha BAQ úshin brıfıng uıymdastyrýǵa múmkindik beredi.
Kezdesý qorytyndysy boıynsha Qazaqstan Prezıdenti birqatar naqty tapsyrma berdi.