Byltyr keńsesine bir sharýamen izdep barǵanymda, Talǵat Baısholaqov ústeliniń ústine etekteı-etekteı qaǵazdardy jaıyp tastap, oılana kóz salyp tur eken. Zady, tabıǵatynan tomaǵa-tuıyq, sózden góri iske usta Tákeń sol kezde sheshilip bir sóılegen. Marqum aǵasyn – sambo kúresinen qazaqtan shyqqan tuńǵysh álem chempıony Qanat Baısholaqovty, Jańaarqadaǵy baldáýren shaǵyn, ataqty «Jas suńqar» sport mektebinde jattyqqan kezin eske alyp, kóńil sherin tarqatqan.
Dál sol sátte men osy Talǵat Baısholaqovtyń ótken ǵasyrdyń 90-shy jyldarynda ózi túlep ushqan «Jas suńqar» sport mektebin oblys ortalyǵy – Qaraǵandyǵa kóshirip ákelgenin esime aldym. Iá, ol kez «Balapan basyna, turymtaı tusyna» ketken aýmaly-tókpeli zaman edi. Qalany aıtpaǵannyń ózinde, aýdan ortalyqtary men aýyldardaǵy áleýmettik nysandar qurylys materıaly retinde tistegenniń aýzynda, ustaǵannyń qolynda ketip jatty. Saý qalǵany oıyn-saýyq ortalyqtaryna, maltapqysh meıramhana-dámhanalarǵa aınalyp shyǵa keldi. Sporttyń mańaıyndaǵy mamandar men jattyqtyrýshylar taıaq ustap qalǵan edi sol kezde...
Mine, sol ýaqytta kásippen aınalysyp júrgen Talǵat Baısholaqov ta Qaraǵandydaǵy bos turǵan ǵımarattan qolma-qol meıramhana nemese dúken jasasa, paıdaǵa kenelip qalary sózsiz-tuǵyn. Biraq, ol álgi ǵımaratty kúrdeli jóndeýden ótkizip, «Eńbek» dep atalatyn sport keshenine aınaldyrdy. Sóıtti de, Jańaarqadaǵy qulaýdyń sál-aq aldynda turǵan «Jas suńqar» mektebin qalaǵa kóshirip ákeldi. Qazir «Jas suńqar» kúres túrleri mektebi» degen jańa ataýy bar bul mektep oblystaǵy kúres óneriniń qutty shańyraǵyna aınalǵan. Erjan Shynkeev bastaǵan qazaq kúresiniń qara narlary dál osy mektepte sheberlik ushtaıdy. Osy uıadan túlep ushqandardyń aldy álem chempıony boldy, Azııada top jardy. Kúreske endi kelgen jas óskinniń kilem jaǵalap júrgeni qanshama?!
Endi joǵarydaǵy áńgimege at basyn buraıyq. Talǵat Baısholaqov óziniń jańa jobany – ómirlik maqsaty deýge bolatyn sharýany qolǵa alǵanyn aıtty sol joly. Ol – Qaraǵandynyń qaq ortasynan óz qarjysyna jańa sport keshenin salmaqshy eken: «Qanat Baısholaqov atyndaǵy sport saraıy».
Elbasy «Egemen Qazaqstandaǵy» «Bolashaqqa baǵdar: rýhanı jańǵyrý» atty maqalasynda týǵan jer, ósken ortasyna kómek qolyn sozyp jatqan jandardyń atyna jyly lebiz bildirdi ǵoı. «Týǵan jerine kómek jasaǵan jandardy qoldap-qurmetteýdiń túrli joldaryn tabý kerek», dedi Elbasy. Shynynda da, oblys basshylary jaqsy istiń basynda turǵan azamatty qoltyǵynan demep jiberse de bolar edi. Sol sport saraıyn aǵaıyndy Baısholaqovtar eshqaıda arqalap ketpeıdi. Qyzyǵyn, ıgiligin salamatty ómirge qulash sermegen qazaqtyń balasy kóredi emes pe?!
Prezıdent jalpyulttyq patrıotızmniń naǵyz ózegine aınalatyn «Týǵan jer» baǵdarlamasyn qolǵa alýdy usynyp otyr. Týǵan jerge degen súıispenshilik týǵan elge, ortaq Otanymyz Qazaqstanǵa degen patrıottyq sezimge ulasady. Talǵat Baısholaqov syndy azamattyń jasap júrgen eńbegi osyndaı bolashaǵy zor ulaǵatty bastamaǵa mysal. Ár azamattyń týǵan jerge degen mahabbaty ol odan qansha uzap ketse de óshpek emes. Bul kez kelgen adamǵa tán qasıet. Elbasynyń «Basqa aımaqtarǵa kóship ketse de týǵan jerlerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderi men jastardy uıymdastyryp, qoldaý kerek. Bul – qalypty jáne shynaıy patrıottyq sezim, ol árkimde bolýy múmkin. Oǵan tyıym salmaı, kerisinshe, yntalandyrý kerek», – degen sózi de osy oraıda aıtylǵany haq. «Elim maǵan ne beredi?» dep emes, «Men elime ne beremin?!» dep eńbek etetin, alǵa umtylatyn sana qajet. Eńsesin endi tiktegen táýelsiz elimiz sonda talaı rýhanı da bıikterden kórineri sózsiz!