● Jarystyń alǵashqy kúni birinshi bolyp Chehııa men Danııa quramalary tartysqa tústi. Danııa fýtbolshylary match bitýge úsh mınót qalǵanda 3:2 esebimen jeńip jatqan. Baq degendi qoısańyzshy. Chehııa quramasy qas-qaǵymda esepti teńestirdi de, týra úsh sekýnd qalǵanda tórtinshi dopty soqty da ketti – 4:3. Qas-qaǵymda tóńkerip ketti.
Qazaq eliniń jankúıerleri záýlim saraıdy dúbirge bólep, dýmandatyp, dýyldap otyr. Jany bólek jankúıerler ishindegi erekshe top kózge ottaı basylady. Dabyl qaǵyp, qıqýǵa basyp tur. Týra aldarynda ilingen «Qazaq eli» degen jazýy bar úlken plakat júregińe nur quıady.
● Makedonııa qaqpasy tas qamal, alǵyzar emes. Bizdiń shabýylshylar sańylaý izdep josyltyp júr. Birinshi kezeńniń bitýine týra jeti mınót qalǵanda, Leonyń parket baýy- ryn jalata tepken qýatty doby qaqpaǵa súńgip ketti – 1:0. Sol Leonyń oń qaptaldan qalyqtata shyǵarǵan dobyn sol qanattan júıtkip kelgen Serik Jamanqulov qapysyz tepti – 2:0.
Osy eseppen Qazaq eli quramasy úziliske shyqty. Jankúıer júzine lyp etip qan júgirdi. Ekinshi kezeńdegi alma-kezek shabýyl nátıje berer emes. Oraıly bir sátte Dýglas shyǵarǵan dopty sol qaptaldan yshqyna umtylǵan Albert Aqbalyqov sol aıaqpen qaqpa toryn solq etkizdi 3:0. «Aqtóbe» klýby oıynshysynyń parketke shyqqany da sol edi, jarq etip kózge tústi.
● Jarystyń ekinshi kúninde Makedonııa men Chehııa quramalary teketirese ketti. Biraq tájirıbesi mol Chehııa quramasy tis batyryp jiberdi – 7:3.
● Bul kúni Qazaq eli quramasy Danııa komandasyn silkilep aldy. Tórtinshi mınót ótkende Jamanqulov jarq etkizip esep ashty – 1:0. Oıynnyń toǵyzynshy mınótinde Leonyń quıyndata tepken dobyna qaqpashy umtylyp ta úlgermedi – 2:0. Tartystyń 17-mınótinde Dýglastyń sol aıaqpen zaýlatqan doby qaqpashydan keıin serpildi. Qaıtqan dopty Mıhaıl Pershın qaqpaǵa zý etkizdi – 3:0. Pershın – basynan baǵy taıǵan «Tulpar» klýbynyń oıynshysy. Qazir «Qaırat» komandasynda. Qýanyshtan atyp turǵan qalyń jankúıer quıryqtaryn basqansha Dýglas esepti ulǵaıtyp úlgerdi – 4:0.
Oıyn bitýge úsh-aq mınót qaldy. Bas bapker oıynǵa Orazov Birjandy shyǵardy, durys sheshim. Osyndaı jaýapty oıynnyń sáti kelgen tusynda shyńdap alý kerek. «Jetisý» klýbynyń bul fýtbolshysy eki kún boıy oryndyqta kezek kútip otyrǵan.
Danııalyqtar dármensiz kúıge tústi, Dinmuhambet Súleımenov soqqan sońǵy dop eseńgiretip tastaǵandaı – 5:0. Osylaısha, Qazaq eli quramasy ekinshi kúni de qalyń jankúıerdi úlken jeńisimen qýantty.
● Jarystyń sońǵy kúni Makedonııa baǵyn asyrdy, Danııany 4:3 esebimen jeńip kósh sońynda qaldyrdy.
Jankúıer qaýymnyń fýtzalǵa degen yqylasy erekshe. «Almaty Arena» qalanyń soltústik batysynda, ájeptáýir jer. Jetý ońaı emes. Jumys kúni bolǵanyna qaramastan, el quramasynyń sheshýshi oıynyna halyq yqylasy keremet. Záýlim saraıdy lyq toltyryp otyr. Osyndaı tileýqor halqy bar komanda jankúıerdi jerge qaratpaýǵa tıis.
● Oıynnyń 5-mınótinde Dýglastyń aınaldyra tepken doby qaqpashydan keıin serpildi. Qaıtqan dopty qas-qaǵymda shirene qaıta tepti. Gol! Chehııa qaqpasy buzyldy – 1:0.
Shyńǵys Esenamanovtyń shyrqyrata tepken dobyn qaqpashy áreń qaıtardy. Asa tartysty oıyn. Jelden ozǵan jyldamdyq. Oıyn óte joǵary ekpinmen ótýde. Eki komanda da bes-bes foldan. Eki komanda da qyzyl syzyq ústinde. Endi tártip buzylsa, aıyp doby daıyn tur. Birinshi kezeńniń aıaqtalýyna týra 59 sekýnd qaldy. Leonyń sátti shyǵarǵan dobyn Pershın qapysyz soqty – 2:0.
Ekinshi kezeńde údeı soqqan daýyldaı tolassyz shabýyldar bastaldy-aı, shirkin. Bizdiń oıynshylar asa saýatty qorǵanýda. Teńizdiń dúleı tolqyndaryndaı ekilene, tynymsyz jasaǵan shabýyldardyń betin qaıtaryp, dopty syrtqa teýip jatyr. Qaptaldaǵy eki tóreshi dopty bizdiń qaqpaǵa baǵyttap kórsetýmen álek.
Ara-tura Dýglasqa qaqpany qaraýyldatyp Igıta oıynǵa qosylyp qoıady. Onyń tepken doby qaqpa jaqtaýyn syndyrardaı, asa qýatty. Ázirshe darymaı tur. Bir kezde qaqpasyn ıesiz tastap Chehııa qaqpashysy da oıynǵa qosyldy. Osyny baıqap qalǵan Dýglas aıaǵyna dop tıgen sátte qaraýsyz qalǵan qaqpaǵa zaýlatty – 3:0.
Qazaq eli quramasy keremet oıyn úlgisin kórsetti. Qarsylas úsh komanda qaqpasyn qaqyratyp 11 dop soqty. Jalǵyz dop ótkizbedi. Bul jerde qaqpashy Igıtanyń keremet sheberligin aıtyp ótken abzal.
● Qazaq eli quramasy endi 2018 jyldyń 30 qańtar men 10 aqpan aralyǵynda Slovenııanyń Lıýblıan qalasynda ótetin Eýropa chempıonatynyń fınalynda aıqasqa túsedi. Qazaq eli quramasyn dúnıeni dýyldatqan nebir ataqty komandalarmen saıysqa túsý baqyty kútip tur.
Zeınel JEKEIULY,
jýrnalıst
ALMATY