Kesheli beri Qaraǵandy oblysy Buqar jyraý aýdanyndaǵy Samarqan sý qoımasynyń qatty nópiri Chkalovo aýylynda 49 úıdi, 70 aýlany shaıyp ótip, 137 adam men 466 bas mal qaýipsiz aımaqqa kóshirildi.
Tótenshe jaǵdaı Qarqaraly jáne Abaı aýdanynyń jekelegen eldi mekenderinde de boldy. Atalǵan aýdandardyń ákimderi jergilikti kólemde tabıǵı sıpattaǵy tótenshe jaǵdaı jarııalaý týraly sheshim qabyldady.
Qazirgi kezde Qaraǵandy oblysyna qarasty jeti eldi mekende turǵyn úıler men aýla aýmaqtar sý astynda qaldy. Sarytóbe, Chkalovo, Sadovoe, Andreınıkovka, Qyzyljar, Krasnaıa Polıana, Qaramuryn, Chkalovo jáne Sadovoe aýyldarynda 49 jáne 42 baspanany sý basqan. Chkalovodan 137, Sadovoe aýylynan 308 adam qaýipsiz jerge kóshirildi.
Odan bólek, Qaraǵaıly jáne Qaıraqty, Tuzdy aýyldyq okrýgynyń 1 maı bólimshesinde de jaǵdaı máz emes. Shopa aýylynda Sherýbaı-Nura ózeni arnasynan asyp, joldardy shaıyp ketken.
Búginde Qaraǵandy aýmaǵynda oblystyq, respýblıkalyq mańyzy bar 47 avtomobıl joldaryn sý basty. «Qaraǵandy-Qarqaraly» jol ýchaskesinde kóliktiń barlyq túrleri úshin qozǵalys toqtatylyp otyr.
Tótenshe jaǵdaılar departamentiniń málimdeýinshe, avarııalyq-qutqarý jumystaryna búgingi tańda 2288 adam, 709 tehnıka tartylǵan. Buqar jyraý, Qarqaraly, Abaı, Shet jáne Osakarov aýdanyndaǵy jaǵdaı baqylaýǵa alyndy.
Qaraǵandy oblysynda sý tasqyny bastalǵaly 1850 adam men 5338 mal basy qaýipsiz jerge kóshirilgen.
Máselege oraı, aımaq basshysy Erlan Qoshanov sý tasqyny kezindegi eń qaýipti oryndardy aralady. Ákim sý qoımalarynan sý aǵyzýdy retteý jáne olardyń deńgeıin saqtaý boıynsha tapsyrma berdi.
«Kúnniń kúrt jylynýyna baılanysty Qaraǵandy oblysynda sý tasqyny jaǵdaıy óte kúrdeli. Úlken sý aǵyny saqtalýda. Negizgi Nura men Sherýbaı-Nura ózenderi tasýda. Búgin-erteń ózenderdegi sý deńgeıi tómendeıdi dep kútilýde. Eki kúnnen keıin sý tasqyny basylady. Keler aptada evakýasııalanǵan adamdar úılerine qaıtady dep oılaımyn, – deıdi oblys ákiminiń orynbasary Andreı Lıapýnov.
Mıras ASAN,
«Egemen Qazaqstan»
Qaraǵandy oblysy