Abaı atyndaǵy Qazaq ulttyq pedagogıkalyq ýnıversıtetinde Elbasynyń maqalasyn qoldaý jáne talqylaý maqsatynda «Rýhanı jańǵyrý – Qazaqstan damýynyń negizi» atty dóńgelek ústel ótti.
Dóńgelek ústelge ýnıversıtet rektory, pedagogıka ǵylymdarynyń doktory, akademık Serik Pirálıev bastaǵan osy oqý ornynyń basshylyǵy, qurylymdyq bólimsheler basshylary, professor-oqytýshylar quramy, stýdentter, magıstranttar jáne doktoranttar qatysty.
Sharany ýnıversıtet basshysy Serik Jaılaýuly ashyp, Elbasy maqalasynda kózdelgen basym baǵyttardy qysqasha túsindirip ótti. Rektor óz sózinde atalmysh baǵdarlamalyq qujattyń ózektiligi men mańyzdylyǵyna toqtalyp, Qazaqstannyń jetken jetistikterin eseleı túsý men alǵa qoıǵan ıgi maqsattarymyzǵa qol jetkizýdiń kilti bolyp tabylatynyn basa aıtty.
Baǵdarlamalyq qujatta aldyǵa qoıylǵan mindetterdi saralap, pikir bildirgen Tárbıe isi jónindegi prorektor, saıası ǵylymdardyń kandıdaty, professor Janatbek Ishpekbaev Elbasy tarapynan qoıylǵan mindetter elimizdi tehnologııalyq damýdyń jańa deńgeıine shyǵaratynyn aıta kele, onda kózdelgen ıgi bastamalardy kezeń-kezeńge bólip, el damýy men órkendeýi úshin birtutastyqty sezinip, tarıhı muralarymyzdy, Qazaqstan Táýelsizdiginiń beriktigin saqtaýǵa baǵyttaıtyn birden-bir jol ekenin atap kórsetti.
Dóńgelek ústelde sóz alǵan fılologııa ǵylymdarynyń doktory, professor Baltabaı Ábdiǵazıuly N.Á. Nazarbaevtyń «2025 jyldan bastap latyn álipbıine kóshýge kirisýimiz kerek» degen oıyn quptap, elimiz latyn grafıkasyna kóshse týystas túrki tildes ulttardyń tilin meńgerý ońaı bolatynyn aıtty. Sondaı-aq, «100 jańa esim» jáne «Álemniń úlgili 100 oqýlyǵy» jobalaryn Qazaqstan bilimi men mádenıetin damytýdyń birden-bir joly dep túsindirdi.
Mıra BAIBEK,
«Egemen Qazaqstan»