Rýhanııattyń máselesine arnalǵan maqalada jańa tarıhı kezeńniń bastalǵany aıtylǵan. Sol úshin dúnıetanymǵa, oılaý júıemizge ábden sińip qalǵan taptaýryn qaǵıdalardan arylý qajettigin aıtqan Elbasy rýhanı jańǵyrý jolyndaǵy mańyzdy basymdyqtar men baǵyttardy aıqyndap bergen edi. Tuńǵysh Prezıdent – Elbasy kitaphanasynda maqalanyń tikeleı mekeme qyzmetkerlerine jáne qoǵamdaǵy árbir jeke adamǵa qatysty tustary jan-jaqty túsindirildi.
Jıyndy Elbasy kitaphanasy dırektorynyń orynbasary Beısembaı Jumabekov ashty. Al, maqaladaǵy negizgi basymdyqtar men baǵyttar týraly Áleýmettik-aǵartýshylyq jobalar qyzmetiniń jetekshi ǵylymı qyzmetkeri Ǵazız Telebaev áńgimeledi. «Tehnologııalyq jańǵyrýǵa arnalǵan bıylǵy Joldaýdan jáne saıası jańǵyrýǵa baǵyttalǵan konstıtýsııalyq reformadan keıin mańyzdy qadam rýhanı jańǵyrý qolǵa alynbaq. Elbasynyń maqalasynda belgilengen maqsat-mindetter – óte ózekti. Almaǵaıyp álem jyldam ózgerýde. Oǵan judyryqtaı jumylǵan ult bolyp beıimdelýimiz kerek», degen Ǵ.Telebaev latyn álipbıine kóshý, týǵan jerdi kórkeıtý, gýmanıtarlyq bilim berý, mádenıetti zamanaýı qalypqa keltirý, qundylyqtardyń búkil qazaqstandyq sheńberin qurý, abyroıly zamandastardy ardaqtaý – barlyǵy naqty tapsyrmalarmen ulasýy qajettigin, ony iske asyrýǵa ýaqyt berilgenin aıtty. Ol sondaı-aq, ulttyq kodty saqtaý arqyly rýhanı jańǵyrý qajet degen maǵynadaǵy Elbasy ıdeıasyn basshylyqqa ala otyryp, búgingi zamanda aǵylshyn tilin bilýdiń qajettiligine toqtaldy. Ásirese, alys-jaqyn shet eldermen baılanystaǵy kitaphana qyzmetkerleriniń aǵylshyn tilinde sóıleı alýy ózekti ekenin jetkizdi. Al, Elbasynyń qoǵamda úlken rezonans týǵyzyp jatqan latyn álipbıine kóshý týraly pikiri «kóshemiz, kóshpeımiz» dep talqylanatyn emes, oryndalýy tıis sharýa ekenine mańyz berdi.
Jıyn barysynda Áleýmettik-aǵartýshylyq jobalar qyzmetiniń jetekshi ǵylymı qyzmetkeri Láıla Ivatova Elbasy maqalasynyń tárbıelik mańyzdylyǵy men mánine kópshiliktiń nazaryn aýdardy. «Qazaqstannyń damý baǵdary elimizde tulǵa jáne adamnyń bostandyǵy qurmetteletinin, ary men abyroıy baǵalanatynyn, adamgershilik qaǵıdalary men rýhanı qundylyqtary joǵary ekenin kórsetedi», dedi ol. Qoǵamdaǵy tulǵanyń jan-jaqty damýy týraly baıandaı kele, jastardyń erliktiń, eńbeksúıgishtiktiń, otanshyldyqtyń úlgisine aınalǵan adamdarǵa qarap boı túzeıtinin málimdedi. Sol úshin Elbasynyń «100 jańa esim» jobasyna qatysty óz pikirin bildirdi. Láıla Myrzalıqyzynyń oıynsha, búgingi tańda jastar eliktep, ónege alatyn tulǵalar kóp-aq. Biraq olardy naqty Elbasy jobasy aıasynda usyný barysynda jaýapkershilikpen saralap, tańdap, el aldyndaǵy eńbegin eskerip shyǵarý qajet.
Jıyn barysynda basqa da qyzmetkerler óz oı-pikirlerin bildirip, Elbasy maqalasyna qyzyǵýshylyq tanytty.
Aıgúl SEIILOVA,
«Egemen Qazaqstan»