Aktıv jıyny oblys ákiminiń mindetin atqarýshy Qýanysh Ysqaqovtyń tóraǵalyǵymen ótti. «El Prezıdentiniń bul maqalasy – Máńgilik elimizdiń maqsat-muratyn júzege asyrýdyń túp negizderin, rýhanı jańǵyrýymyzdyń negizgi baǵyttaryn aıqyndap bergen ult jadynyń tuǵyrnamasy deýge bolady», degen Qýanysh Dosmaıyluly Elbasy maqalasynda aıtylatyn negizgi máselelerge egjeı-tegjeıli toqtaldy.
− Memleket basshysy aıtqandaı, biz ulttyq kodymyzdy saqtap, zamana synyna tótep bere alatyn ozyq dástúrlerimizdi tabysty jańǵyrta otyryp, órkenıet kóshine ilesýimiz kerek. Bul rette, Syr óńiri tarıhyn tereńnen tartqan, qaımaǵy buzylmaǵan ulttyq mádenıetimiz ben dástúrimizdi búginge jetkizip, jańǵyrtyp, jas urpaqqa nasıhattap otyrǵan birden-bir ólke deýge negiz bar. Elbasy óz maqalasynda «Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda, ulttyq rýhymyz máńgi qalýǵa tıis» – dedi. Osy rette, Syr eliniń óneri óz jerimizde ǵana damyp qoımaı, Túrkııaǵa, Londonǵa, AQSh-tyń Nıý-Iork, Vashıngton qalalaryna, Ázerbaıjan Respýblıkasyna tanylýda. Osy kúnderi oblysymyzdyń teatry Baký, Shekı qalalarynda gastroldik saparda júr,– dedi Qýanysh Ysqaqov. Sonan soń ulttyq ıdeologııanyń ustyny bolarlyq qujattan týyndaıtyn máseleler boıynsha basqarmalarǵa naqty tapsyrmalar júktedi.
Jıyn barysynda sóz alǵan aryndy aqyn Sháhızada Ábdikárimov Elbasy maqalasyndaǵy ultty Máńgilik etý jolyndaǵy aspektilerdi keńinen tolǵap, tereńinen qaýzady. Qorqyt ata atyndaǵy QMÝ-dyń Qazaqstan halqy Assambleıasy kafedrasynyń meńgerýshisi Nurlybek Myńjasov sananyń jańǵyrýy jaıynda tolymdy baıandama jasady. Qyzylorda oblysy bilim basqarmasy basshysynyń orynbasary Baǵdat Berdáýletov aımaqtaǵy bilim salasynda atqarylyp jatqan sharýalarǵa toqtaldy. Qorqyt ata atyndaǵy QMÝ-dyń qazaq tili men ádebıeti jáne jýrnalıstıka kafedrasynyń professory Aman Abasılov latyn qarpine kóshýdiń artyqshylyqtary men utymdy tustary haqynda sóz qozǵady. Al «Qoǵamdyq kelisim» ortalyǵynyń basshysy Ýálıhan Ibraev maqalada aıtylǵan mindetterdiń el ómirine eleýli ózgerister ákeletinin aıtty. Baıandamashylardyń barlyǵy Elbasy maqalasynyń mańyzy men Qazaqstannyń ǵylym-bilim, tarıh, ádebıet, áleýmettik jáne taǵy da basqa salalardyń damýyna oń yqpaly týraly áńgime órbitti.
Sondaı-aq, otyrys barysynda maqalada kórsetilgen «Ulttyq sana», «Týǵan jer» baǵdarlamasy, «Qazaq tilindegi 100 jańa oqýlyq», «Mádenı-geografııalyq beldeý», «100 jańa esim» jáne ózge de máseleler keń kólemde talqylanyp, qatysýshylar tarapynan qoldaýǵa ıe boldy.
Erjan BAITILES,
«Egemen Qazaqstan»
QYZYLORDA