Bilim berý standarttarynyń joǵary deńgeıin jetildirý úshin sapaly ǵylymı platforma bolyp otyrǵan konferensııa turaqty damý maqsatynda ártúrli elderdiń ǵylymı qoǵamdastyǵy men halyqaralyq uıymdardyń arasyndaǵy ózara qyzmet pen dıalogty uıymdastyrýǵa baǵyttaldy. Ǵylymı pikirtalastyń sessııalary men negizgi baǵyttary myna úsh másele boıynsha órbidi. Jýrnalıstik bilim berýdiń halyqaralyq trendtteri, jáne onyń ishinde jýrnalıstik bilim berýdiń jahandyq baǵyttary; Qazaqstandyq medıa-mektep, ınnovasııalyq modelder. Ekinshi baǵyt halyqaralyq jýrnalıstıkanyń – damý baǵyttaryna arnalyp, mamandyqtyń jańa standarttary, Ortalyq Azııadaǵy jýrnalıst mártebesi, retteý quraldary jáne BAQ-taǵy ózin ózi retteý, jýrnalıstik sheberlik jáne buqaralyq mádenıet nysanyndaǵy kásibılik, turaqty damý jáne jýrnalıstıka: ózara qarym-qatynas aspektileri, azamattyq jýrnalıstıka kontenti syndy máselelerge arnaldy. Úshinshi baǵyt boıynsha Halyqaralyq jýrnalıstıkany damytý salasyndaǵy MTIJ konferensııasynyń múmkindikteri; jýrnalıstıka pedagogtarynyń korparasııasyn qurý men uıymdastyrý máseleleri boıynsha usynystar tereń talqylandy. Shara aıasynda halyqaralyq jýrnalıstıka salasynyń jetekshi mamandarymen sheberlik synyptary ótkizilip, qatysýshylarǵa sertıfıkattar tabystaldy.
Jıynǵa Ál-Farabı atyndaǵy QazUÝ jýrnalıstıka fakýltetiniń dekany Saǵatbek Medeýbek, IýNESKO, halyqaralyq jýrnalıstıka jáne qoǵamdyq medıa kafedrasynyń meńgerýshisi Nazgúl Shyńǵysova, Almatydaǵy IýNESKO Klasterlik bıýrosynyń kommýnıkasııa jáne aqparat bóliminiń basshysy Sergeı Karpov, «Qazaq gazetteri» JShS Bas dırektory Jumabek Kenjalın, Polshadaǵy Adam Mıskeevıch ýnıversıtetiniń kadr jáne qarjy jónindegi prorektory Tadaýesh Vallas, MDP baǵdarlamasynyń dırektory , Kolýmbııa ýnıversıtetiniń adıýnk-professory Rafıs Abazov syndy bilikti mamandarmen qatar elimizdegi BAQ basshylary, Qazaqstandaǵy BUU Qoǵamdyq Aqparat Departamentiniń ókilderi, sheteldik memleketter elshilikteri men konsýldyqtarynyń ókilderi, AQSh, Ulybrıtanııa, Polsha, Túrkııa, Reseı buqaralyq kommýnıkasııa ǵalymdary men zerteýshileri, oqytýshylar, magıstranttar men doktaranttar qatysty. Joǵaryda aıtylǵan mańyzdy máselelerge baılanysty baıandamalar oqylyp, erkin pikirtalas júrgizildi.
– Qazirgi jahandaný kezeńinde eń mańyzdy taqyryptyń biri – turaqty damý. Al jýrnalıstıkadaǵy ózekti másele – sandyq, mýltımedııalyq ınteraktıvti kommýnıkasııalyq tehnologııalar dáýirinde halyqaralyq deńgeıde jýrnalıster daıyndaý sapasy, Qazaqstandaǵy qazirgi jýrnalıstik bilim berýdiń deńgeıi. BUU akademııalyq yqpal Hab baǵdarlamasynyń aıasynda ótkizilýi mańyzyn odan da arttyra túsedi. Biz Qazaqstanda otyryp, álemniń túkpir-túkpirinde obektıvti, tolyqqanda jan-jaqty maqala jarııalaıtyn, halyqaralyq eńbek naryǵynda básekege qabiletti jýrnalıstke tán quzirettilikter qalyptastyrýymyz qajet. Bundaı konvergensııa Qazaqstannyń aqparat naryǵyn saqtaýǵa múmkindik beredi – deıdi, IýNESKO, halyqaralyq jýrnalıstıka jáne qoǵamdyq medıa kafedrasynyń meńgerýshisi Nazgúl Shyńǵysova. Sondaı-aq, is-sharada otandyq jýrnalıstıkany jan-jaqty damytýdyń jańa baǵyttaryna baılanysty kóptegen usynystar aıtyldy.
Arman OKTIаBR,
«Egemen Qazaqstan»
ALMATY