Atap aıtqanda, eki eldiń prezıdentteri Qazaqstan men Túrkimenstan arasyndaǵy strategııalyq áriptestik týraly kelisimdi, sondaı-aq qazaq-túrkimen memlekettik shekarasyn shegendeý týraly shartty rásimdedi. Al úkimetter deńgeıinde ǵylymı-texnıkalyq, ekonomıkalyq jáne mádenı-gýmanıtarlyq máseleler boıynsha úkimetaralyq komıssııa týraly kelisimge, úkimetter arasyndaǵy qupııa aqparattardy ózara qorǵaý týraly shartqa, syrtqy ister mınıstrlikteriniń yntymaqtastyq baǵdarlamasyna, qarjy mınıstrlikteri arasyndaǵy qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl salasyndaǵy ózara árekettestik týraly kelisimge, Astana men Ashxabad arasynda baýyrlastyq týraly kelisimge, sondaı-aq eki eldiń kásipkerlik palatalary arasyndaǵy yntymaqtastyq týraly shartqa qol qoıyldy.
"Búginde Qazaqstan men Túrkimenstan Ortalyq Azııadaǵy baýyrlas ári kórshiles áriptester bolyp tabylady. Barlyq basty baǵyttar boıynsha joǵary deńgeıde ózara túsinistikke qol jetkizdik, syndardy dıalog ótkizdik. Aramyzda ortaq tıimdi sheshim tabylmaǵan birde-bir túıtkildi másele joq, túrli óńirlik jáne xalyqaralyq uıymdar arasynda tabysty is-qımyl jasap kelemiz. Bizdiń otyn, energetıka, kólik pen tranzıt salalarynda ekonomıkalyq yntymaqtastyǵymyz qarqyndy damýda", - dep atap kórsetti Elbasy Nursultan Nazarbaev.