Jıyndy Áset Isekeshevtiń ózi júrgizdi. El Prezıdentiniń maqalasy jaıynda salmaqty sóz qozǵady. Jınalǵandarǵa ol týraly «Qandaı oı-pikirlerińiz bar? Irikpeı aıtyńyzdar» degen saýal tastady.
– Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasy elimizdiń aldaǵy ýaqytta júretin joly men negizgi baǵdaryn aıqyndap berdi. Bul Memleket basshysynyń «Qazaqstan-2050» strategııasynda aıtylǵan negizgi basymdyqtarmen astasyp jatyr. Jahandaný dáýirinde, álemdik báseke qyzǵan ýaqytta árbir memleket óziniń ulttyq bolmysyn saqtaı otyryp, dúnıe kóshinen qalmaýdy oılaıdy. Osy oraıda Elbasynyń jańa maqalasy birqatar mańyzdy jaıttardy qozǵaǵan. Onyń ishinde ulttyq sanany qalyptastyrý, bilim salasyn damytý, básekelestikti nyǵaıtý, týǵan jerge – Otanǵa degen qurmet, álemdik úzdik týyndylardy aýdarý máseleleri asa ózekti deýge bolady, – dep sózin bir qaıyryp ótti.
Odan keıin elorda ákimi qaladaǵy kitap dúkenderinde qazaq tilindegi kitaptardyń azdyǵyn aıtty. Sonymen qatar, elordadaǵy memlekettik tildiń damýyna da toqtaldy. Onyń aıtýynsha, ótken jylǵy esep boıynsha Astana turǵyndarynyń 82 paıyzy memlekettik tildi jaqsy biledi. Al 2009 jyly bul kórsetkish 62,3 paıyz ǵana bolǵan.Alty jyldyń ishinde qazaq tilin biletinderdiń sany 19,7 paıyzǵa kóterilgen. Al ótken jylǵy ólshemmen alsaq, eresekter arasynda aǵylshyn tilin biletinderdiń qatary 25 paıyz bolsa, 2009 jyly ol 7 paıyz bolǵan. Osy aralyqta onyń sany 18 paıyzǵa ósken. Astana ákimdiginde árbir toqsan saıyn memlekettik tildegi shyǵys jáne kiris qujattaryn júrgizý monıtorıngi jasalady. Sonyń nátıjesinde kiris qujattarynyń jalpy sany 340 251 bolsa, sonyń qazaq tilindegisi 222 010-dy quraǵan. Paıyzben aıtqanda – 65,8 paıyz. Al shyǵys qujattarynyń jalpy kólemi 198 150 bolsa, onyń memlekettik tildegisi – 189 458, ıaǵnı 85,6 paıyzdy quraǵan. Sonymen birge, qala basshysy elordadaǵy balabaqshalar men mektepterdiń jyl sanap kóbeıip kele jatqandyǵyn aıtty.
Elorda basshysynyń sózinen keıin Astana ákiminiń orynbasary Ermek Amanshaev Elbasynyń maqalasyna baılanysty baıypty baıandama jasady. Ol árbir taraýǵa jeke-jeke toqtaldy.
– Maqalada eń áýeli ulttyq sana týraly baıandalǵan. Bizdiń ulttyq sanamyz Otanǵa, týǵan tilge, tarıhqa, salt-dástúrge degen qurmetpen bite qaınasqan. Ulttyq sana – ult rýhanııatynyń negizi. Urpaqtan-urpaqqa tarıhı, rýhanı mura tulǵalar taǵylymy, ulttyq qundylyqtar men dástúr saltqa negizdelgen tárbıe-tálim, nasıhat arqyly berilip otyrady.
Bul qundylyqtar – Máńgilik el bolýdy qalyptastyratyn ıdeologııalyq tuǵyrnama. Búginde óziniń ulttyq ereksheligin, derbes kodyn saqtaǵan, sol arqyly álemdik órkenıet jetistikterin qabyldaı bilgen el ozady. Elbasymyz «Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda, ulttyq rýhymyz boıymyzda máńgi qalýǵa tıis», deıdi. Bul zamanda adam kapıtalyna jeter qundylyq joq. Sol úshin Memleket basshysy jastarǵa, bilimge ınvestısııa salýǵa erekshe kóńil bólýde. Endi bilim men ǵylymǵa negizdelgen ekonomıkany, paıdaly óndiristi damytýymyz qajet. Ahańnyń – Ahmet Baıtursynovtyń «Bilimdi bolýǵa oqý kerek. Baı bolýǵa kásip kerek. Kúshti bolýǵa birlik kerek. Osy kerekterdiń jolynda jumys isteý kerek» degen jaqsy sózi bar, – dedi qala ákiminiń orynbasary.
Sondaı-aq, mańyzdy sharada Astana qalalyq ardagerler keńesiniń tóraǵasy Sansyzbaı Esilov, «S.Seıfýllın atyndaǵy Qazaq agrotehnıkalyq ýnıversıteti» AQ basqarmasynyń tóraǵasy, qalalyq máslıhattyń depýtaty Aqylbek Kúrishbaev, «Sesna-Astyq» Kon-
serni» AQ dırektory Ilıa Mesherıakov, d-jıý-djıtsý sport túrinen álem chempıony Móldir Mekenbaeva, «Jas Otan» JQ Astana qalalyq fılıalynyń tóraǵasy Muhammed Bolysbek sóz alyp, Memleket basshysynyń maqalasy jaıynda óz pikirlerin bildirip, ony tolyǵymen qoldaıtyndyqtaryn jetkizdi.
Jıyndy Astana ákimi Áset Isekeshev qorytyndylady.
– Búgin Elbasy belgilegen negizgi mindetter boıynsha jaqsy oılar, mańyzdy usynystar aıtyldy. Endi, bizdiń mindet osy aıtylǵan jaıttardy júzege asyrý qajet, – dep naqty dáıektermen keltirdi.
Azamat ESENJOL