Amerıkanyń Ogaıo shtaty Klıvlend qalasynyń polısııasy Feısbýk áleýmettik jelisiniń tikeleı efırindegi kisi ólimine qatysty qylmystyq isti tergep jatyr. Vıdeoda jeli qoldanýshylarynyń biri, 37 jastaǵy Stıv Stıvens egde jastaǵy adamdy atyp óltirdi. Quqyq qorǵaýshylar kúdiktige izdeý saldy. Belgili bolǵandaı, ol óz paraqshasynda budan buryn da adam óltirgeni týraly jazǵan.
Tikeleı efırdegi vıdeo 16 sáýir kúni Klıvlend qalasynda jergilikti ýaqytpen 14:00-de bastalyp, 57 sekýndqa sozylǵan. AQSh-tyń BAQ ókilderi bul vıdeony «Klıvlendtegi qandy kórsetilim» dep atap ketti.
Stıv Stıvens onlaın-kórsetilimin kólikte otyrǵan jerinen bastaǵan. Ol kólikten túsip, kóshedegi beıtanys áıel adamǵa jaqyndaıdy. Stıvenstiń oǵan «qazir bolatyn oqıǵaǵa tek sen kinálisiń» degeni estiledi. Budan keıin ol kóshede ótip bara jatqan avtokólikti toqtatady. Onyń rólinde egde jastaǵy er adam otyrǵan.
«Men kimdi óltiretinimdi taptym. Myna kári kisini dál osy jerde óltiremin», – degen Stıvens kóliktiń esigin ashyp, qart adamǵa oq atady.
«Kúdikti rasynda Feısbýk jelisinde kisi ólimin tikeleı efırden taratqan. Sondaı-aq ol budan buryn da birneshe ret adam óltirgenin málimdepti, alaıda, ol derekter ázirge anyqtalǵan joq», – dedi Klıvlend polısııasynyń ókilderi.
BAQ málimeti boıynsha, oqıǵadan soń Stıvens taǵy bir post jazyp, onda kisi ólimine burynǵy súıiktisin kinálaǵan. Ol súıiktisimen úsh jyl kezdesip júrip, endi úılenbekshi bolǵanyn aıtady. Ekeýiniń qarym-qatynasy qıyndap ketkenin jáne sonyń kesirinen qumar oıyndarǵa áýes bolyp, bar jıǵan aqshasyn utylyp qalǵanyn alǵa tartqan.
Amerıkalyq basylymdardyń biri habarlaǵandaı, Stıvens áleýmettik jelidegi paraqshasyna buǵan deıin 15 adamdy óltirgenin jazǵan. Alaıda, Klıvlend polısııasy ázirge onyń qolynan bir adam qaza bolǵanyn rastap otyr. Ol vıdeodaǵy – 74 jastaǵy Robert Gýdvın.
Kisi ólimi kórsetilgen vıdeo jelide eki saǵat boıy jarııa bop turdy. The Washington Post gazeti sol aralyqta vıdeonyń 150 myń ret qaralǵanyn jazdy.
Vıdeo eki saǵat ishinde jelide keń taralyp, úlken tanymaldyqqa ıe boldy. Osyǵan baılanysty qaza bolǵan kisiniń nemeresi Raıan Godvın tvıtter arqyly halyqqa júgindi. «О́tinemin, bul vıdeony bólisýdi qoıyńyzdarshy, ony jarııalaǵan adamdarǵa shaǵymdanyńyzdar. Bul meniń atam, adamdyq tanytyńyzdarshy!», – dep jazdy ol.
Belgili bolǵandaı, jan túrshigerlik vıdeonyń avtory Stıv Stıvens óz-ózine qol jumsady.
«18 sáýir kúni tańerteń Pensılvanııa shtatynyń polıseıleri Erı okrýginde kúdiktini baıqaǵan. Biraz ýaqyt boıy polısııa qyzmetkerlerinen qashqan ol aqyry ózin-ózi atyp óltirdi», – delingen polısııanyń tvıtterdegi blogynda. Budan buryn quqyq qorǵaý organdary kúdikti týraly aqparat bergenge 50 myń dollar usynylatynyn habarlaǵan bolatyn.
Feısbýk kompanııasy bolǵan oqıǵaǵa qatysty resmı málimdeme jasady. Kompanııanyń basshysy ári negizin qalaýshy Mark Sýkerberg qaza bolǵan Robert Godvınniń týǵan-týystaryna kóńil aıtty.
«Bolashaqta mundaı qaıǵyly oqıǵalardyń aldyn alý úshin kóp eńbek etip, qoldan kelgenniń barlyǵyn jasaımyz», – dedi ol.
«Jeksenbi kúni tańerteń Klıvlend qalasynda 37 jastaǵy Stıv Stıvens áleýmettik jelide vıdeo jarııalap, onda kisi óltirýge bel býǵanyn aıtady. Sodan soń egde jastaǵy er azamatty atyp óltirgen vıdeosyn júktegen. Birneshe mınýttan soń tikeleı kórsetilim arqyly qylmysty moıyndaǵan. Bul jan túrshigerlik oqıǵa. Feısbýkta mundaıǵa oryn joq. Bul bizdiń barlyq erejelerimiz ben nusqaýlarymyzǵa qarsy keledi, – dedi kompanııanyń ǵalamdyq qyzmet jónindegi vıse-prezıdenti Djastın Osofskı. – Biz vıdeoǵa baılanysty birinshi shaǵym túskennen keıin 23 mınýttyń ishinde kúdiktiniń akkaýntyn buǵattadyq. Alaıda, buǵan deıin vıdeo eki saǵat boıy erkin qoljetimdilikte bolǵan. Bul uzaq ýaqyt ekenin túsinemiz».
Feısbýk qyzmetkerleri joıyp úlgergenshe, kisi ólimi týraly kontent ózge de áleýmettik jelilerge tarap ketken.
Kópshilik vıdeonyń der kezinde joıylmaýyna baılanysty Feısbýk áleýmettik jelisin aıyptady. О́z kezeginde, kompanııa birinshi shaǵym vıdeo jarııalanǵannan bir jarym saǵat ótkennen keıin ǵana kelip túskenin alǵa tartty.
Árıne, jelige júkteletin kontent aýqymy asa keń bolǵandyqtan kompanııa barlyǵyn baqylaı almaıdy. Olar dúnıe júzi boıynsha mıllıondaǵan qoldanýshysynyń kómegine júginedi. Sebebi, ár jeli qoldanýshysy kez-kelgen daýly jarııalanymǵa qatysty shaǵym jasaı alady. Bul shaǵymdardy Feısbýk qyzmetkerleri qarap, tıisti sharalar qabyldaıdy. Alaıda, bul mehanızmniń únemi tıimdi bola bermeıtinin baıqap otyrmyz.
Feısbýktyń málimdeýinshe, qazirgi ýaqytta kompanııa qyzmetkerleri saıtqa kúndelikti 40 tilde júkteletin mıllıondaǵan kontentti qadaǵalap otyr.
Stıv Stıvenstiń Facebook Live qyzmeti arqyly taratqan tikeleı kórsetilimi ınternet qoldanýshylarynyń jaǵasyn ustatty. Alaıda, mundaı sıpattaǵy vıdeolar jeliniń tikeleı efıri arqyly buryn da kórsetilgen eken.
Máselen, osy sáýir aıynyń basynda úndistandyq stýdent qonaq úıdiń shatyrynan sekirip, óz-ózine qol jumsaǵan. Odan buryn ol Feısbýk jelisindegi onlaın-kórsetilim arqyly kópshilikke kózdegen áreketin aıtyp bergen.
Sondaı-aq bıylǵy naýryz aıynda Feısbýktyń tikeleı efırinde Chıkagoda bir top jigittiń 15 jasar qyzdy zorlaǵany kórsetildi.
Daıyndaǵan Aıdar О́RISBAEV,
«Egemen Qazaqstan».