Kezdesýge Qazaqstan Respýblıkasynyń Prezıdenti Ákimshiligi basshysynyń orynbasary M.Tájın, Din isteri jáne azamattyq qoǵam mınıstri N.Ermekbaev, Qazaqstan musylmandary dinı basqarmasynyń tóraǵasy, Bas múftı E.Maıamerov, ımamdar – K.Dúısenbaı, N.Esmaǵanbet, N.Aýyshanuly, A.Kerimbek, T.Ospan qatysty.
Elbasy qatysýshylarǵa arnaǵan sózinde Qazaqstan halqynyń ómirinde dinniń erekshe ról atqaratynyn atap ótip, ýákiletti organdar tarapynan dinı qarym-qatynastardy retteý úshin qabyldanyp jatqan sharalarǵa toqtaldy.
– Memleket bul máselege erekshe kóńil bólip otyr. Problemalarǵa taldaý jasap, osy salaǵa qoldaý kórsetetin arnaýly mınıstrlik qurdyq.
Jaqynda men tarıhı jáne rýhanı baılyǵymyzdy saqtaı otyryp, ony arttyrý, sanany jańǵyrtý qajettigi týraly maqala jarııaladym. Patrıotızm, otandy súıý, el ishindegi jáne óńirlerdegi turaqtylyq – bizdiń bolashaǵymyz. Sol úshin biz birlese jumys isteýge tıispiz, – dedi Memleket basshysy.
Nursultan Nazarbaev sıfrlyq tehnologııalar damyǵan dáýirde Qazaqstan óziniń ulttyq qundylyqtaryn, mádenıeti men salt-dástúrin saqtaýǵa tıis ekenin aıtty.
Sondaı-aq, Qazaqstan Prezıdenti destrýktıvti dinı aǵymdarǵa qarsy kúres júrgizý qajettigine nazar aýdardy.
– Qazaqstannyń aýmaǵy ulan-baıtaq jáne tabıǵı qazba baılyq pen resýrstarǵa baı ekeni barshaǵa belgili. Osynyń bárine qyzǵanyshpen qaraıtyndar da bar. Olar – bizge qastyq oılap, qoǵamymyzdyń yntymaǵyn buzýǵa tyrysýshylar. Halqymyzdyń arasyna teris dinı aǵymdardy engizý bizge syrttan yqpal etýdiń bir tásili bolyp sanalady. Sońǵy ýaqytta osyndaı úrdis baıqalyp otyr. Biz memlekettigimizge qaýip tóndiretin kez kelgen qubylyspen kúresýge tıispiz. Sondyqtan sizderdiń aldaryńyzda zor mindetter tur, – dedi ımamdarǵa arnaǵan sózinde Elbasy.
Memleket basshysy Qazaqstan musylmandary dástúrli túrde hanafı mazhabyn ustanatynyn, ıslamnyń osy baǵytynyń negizin túsindirýge mashyqtanǵan mamandar daıarlaý qajettigin atap ótti.
– Búginde Qazaqstan musylmandary dinı basqarmasynda 3800 ımam jumys isteıdi. Olardyń jartysy dinı saýattylyqty arttyrý kýrstarynan ótken. Alaıda, munyń jetkiliksiz ekenin aıta ketken jón. Bizge osy salada jumys isteıtin ımamdar men mamandardyń bilim deńgeıin arttyrý jaıyn oılastyrý qajet.
Oqyǵan ımam ǵana durys bilim bere alady. Ol óz dinin tereń tanyp, ózge dinderdiń erekshelikterin zerttep, basqa da bilimderdi ıgergen adam bolýǵa tıis. Imamdar sheshendik ónerdi, adam psıhologııasyn meńgergen ıdeologtarǵa aınalýy kerek, – dedi Nursultan Nazarbaev.
Áńgime barysynda Qazaqstan Prezıdenti «Nur Múbarak» ýnıversıtetiniń jumysymen jáne ony budan ári damytý josparymen tanysty.
Elbasy jas urpaqtyń dinı saýatsyzdyǵyna aıryqsha nazar aýdardy.
– Dinı saýatsyzdyǵynyń nátıjesinde jastarymyz saqal qoıyp, shalbarynyń balaqtaryn qysqartyp tastaıdy. Qara kóılek kıip, beti-aýzyn tumshalaǵan qyzdarymyzdyń qatary kóbeıdi. Bul bizdiń dástúrimizge de, halqymyzǵa da jat. Buǵan zańnamalyq deńgeıde tyıym salý máselesin pysyqtaý kerek. Qazaq qara kıimdi qaraly kezde ǵana kıedi, – dedi Memleket basshysy.
Nursultan Nazarbaev qazaq mádenıetiniń tarıhyna, qazaq áıelderiniń dástúrli kıimine toqtalyp, qara kıim men din arasynda eshqandaı baılanys joq ekenin aıtty.
– Eger jastarymyz halqymyzǵa jat ýaǵyzdarǵa erse, memleketimizdiń bolashaǵy ne bolmaq? Biz buǵan jol bermeımiz. Táýelsiz Qazaqstannyń bolashaǵy jarqyn, ultymyz tatý bolyp, elimiz zaıyrly memleket retinde odan ári damýǵa tıis. Biz ózimizdiń ıgi maqsatymyzǵa qarsy shyqqandarǵa kóne almaımyz. Bul – memlekettik apparattyń ǵana emes, barsha Qazaqstan halqynyń, onyń bolashaǵynyń múddesi, – dedi Qazaqstan Prezıdenti.
Elbasy halyq arasyndaǵy dinı saýattylyqtyń mańyzdylyǵyn atap ótip, ımamdardyń óz qyzmeti barysynda patrıottyq tárbıege den qoıýǵa tıis ekendigine nazar aýdardy.
– Naǵyz musylmandy kıgen kıiminen emes, ishki ımanynan tanıdy. Adamnyń júreginde súıispenshilik bolsa, sonyń ımany bar. Biz órkenıetti álemge qaraı qadam basyp, ǵylym men bilim esigin ashýymyz qajet. XVIII-XIX ǵasyrlarǵa deıin musylman dúnıesi búkil álemde kóshbasshy boldy. Ol ǵylymnyń qaınar kózi, fılosoftardyń, dárigerler men jazýshylardyń otany boldy. Qazir biz bul jaǵynan kóshbasshylyq ornymyzdan aıyrylyp qaldyq.
Búginde azamattarymyz ınternet arqyly túrli málimetter alady. Osylaısha, dástúrli emes aǵymdardyń da ýaǵyzyn tyńdap júr. Ol úshin túrli ádister men tehnologııalar qoldanylýda. Biz de olarmen kúres júrgizý úshin aqparattyq tehnologııalardy qoldanýymyz kerek. Qajet bolǵan jaǵdaıda, memleket Qazaqstan musylmandary dinı basqarmasyn qoldaýǵa daıyn.
Men ózimniń maqalamda «Týǵan jer» baǵdarlamasyna erekshe kóńil bóldim. Ol bizge ár óńir, ár eldi meken týraly mol maǵlumat alýǵa múmkindik beredi. Árqaısymyzdyń júregimizde patrıotızm bolýǵa tıis. Osy oraıda óz ýaǵyzdaryńyzda Otandy súıý taqyrybyna aıryqsha kóńil bólýlerińizdi suraımyz, – dep túıindedi Memleket basshysy.
Sondaı-aq, kezdesýge qatysýshylar dástúrli emes dinı aǵymdarǵa qarsy kúrestegi ózara is-qımyl máseleleri jónindegi oılaryn ortaǵa saldy.