Ol Mahambet, Kirpishti aýyldary men baý-baqsha ujymdarynyń aǵymdaǵy jaǵdaıymen tanysyp, Elek, Sazdy ózenderiniń saǵasyn qarap shyqty.
Berdibek Saparbaev saıajaı alqaptary turǵyndaryn tyńdap, úılerin aralap shyqty.
– Jaǵdaı ońaı emes, árıne, jáne tek Aqtóbeniń basyna túsip otyrǵan joq. Bul ýaqytsha qıyndyqtar, kishkene sabyr saqtaý qajet. Bizdiń mindetimiz – osy máseleniń sheshilýine barynsha atsalysý. Eń bastysy – dúrlikpeı, birlese otyryp bir-birimizdi qoldaýǵa tıispiz. Eshkim nazardan jáne járdemnen tys qalmaıdy, biraq kórsetiletin kómektiń barlyǵy zań aıasynda bolady. Keltirilgen shyǵyndy anyqtap, sý tasqyny saldaryn boldyrmaý sharalaryn júrgizetin qalalyq komıssııa qurylǵan bolatyn. Komıssııa árbir otbasymen jeke-jeke jumys jasap, olardyń materıaldyq jaǵdaıyn qarastyra otyryp, shyǵyndaryn baǵalaıdy. Biraq, ol úshin quqyq belgileýshi qujattar qajet. Komıssııa árbir úı boıynsha naqty sheshim qabyldaıtyn bolady, – dep túıindedi óz oıyn óńir basshysy.
Sondaı-aq, oblys ákimi №40 jáne Qarǵaly orta mektepterindegi ýaqytsha ornalastyrý beketterine de bardy. Munda 500-den asa adam bar, olardyń 200-i bala.
Eske sala keteıik, Aqtóbede jergilikti aýqymdaǵy tabıǵı sıpattaǵy tótenshe jaǵdaı jarııalanǵan bolatyn. О́ńirde saıajaılardaǵy 597 úı men aýlany sý basyp, 1510 adam qaýipsiz jerlerge kóshirildi, 69-y qutqaryldy. Adamdar sý basqan oryndardan kereýet, kórpe-tósek, ystyq taǵamdary bar ýaqytsha kóshirý oryndaryna ornalastyryldy. Orta mektepter janynan 7 beket ashyldy. Onyń tórteýine 832 adam ornalastyrylsa, 325-i balalar.
Temir QUSAIYN,
«Egemen Qazaqstan»
Aqtóbe oblysy