Jetisý jerinde bıyl kóktem jaıymen keldi. Jańbyrly bolǵanymen, jadyraı shyqqan kún taýlardaǵy aq qardy óz mezgilinde eritip te otyrdy. Sondyqtan Talǵar, Esik, Túrgen, Qaskeleń, Qarǵaly, Sarqan, Aqsý, Tentek, Qaratal ózenderi arnalarynan aspaı, aryndamaı aqty. Nátıjesinde eldi mekenderge qar sýynyń qaýpi tóngen joq.
Almaty oblystyq Tótenshe jaǵdaılar departamentinen alynǵan málimetke súıensek, Ile Alataýy, Jetisý (Jońǵar) Alataýy jáne Hantáńiriniń basynda ǵana qar qalypty. Muzdaqtar jyldaǵydaı shilińgir shildeniń ortasynda ǵana erıtindikten, bógetterde bulqynyp, salalyq qyzmetkerlerdi ábigerge túsirýi múmkin. Al ázirge esh alańsyz sharýany kúıtteı berýge bolady.
Jazdyń aptap ystyǵynda tek Sharyn ózeni men Kólsaı kólderi arnalarynan asyp jatsa, bógetter búlinip qana qoımaı, etektegi eldi mekenderge qaýip tóndiretindigin de umytpaǵan lázim. Biraq dál qazir oǵan alańdaıtyndaı sebep joq, dep otyr mamandar.
Nurbol ÁLDIBAEV,
«Egemen Qazaqstan»
Almaty oblysy