Qazaqstan Qarýly Kúshteriniń qurylǵanyna 25 jyl tolýyna oraı bas qalada buryn-sońdy bolyp kórmegen aýqymda áskerı parad ótetinin buǵan deıin habarlaǵan bolatynbyz. Astananyń irgesinde qos tikken jaýyngerler osy saltanatty sherýge kún qurǵatpaı qyzý daıyndalýda. Sarbazdar saltanatty sharaǵa ázirlenip, jer-jerdegi bólimderden áskerı tehnıkalardy jetkizip, olardyń aqaýlaryn jóndep, boıap-syrlap jatyr.
Qorǵanys mınıstrligi salanyń qýatyn ózimizge de, ózgelerge de pash etetin aýqymdy sharaǵa ázirlik barysyn jýrnalısterge tanystyrý úshin 68665 áskerı bólimine medıa-sapar uıymdastyrǵan bolatyn. Bir top jýrnalıst áskerı polıgon aýmaǵyna aıaq basqan ýaqytta at shaptyrym jerde 120 shatyr tigýli turǵanyn kórdi. Lagerdiń shet jaǵynda taǵy 12 shatyrda sharýashylyqqa qajetti zattar, azyq-túlikter saqtalady eken.
Jaýyngerlerge arnalǵan ár shatyrǵa 40 sarbazdan ornalasqan. Sarbazdar men kýrsanttar sáýir aıynyń basynan beri mekendep jatqan shatyrlarǵa bas suǵyp kórdik. Olardyń árqaısysynyń ishinde 40 tósek, pesh, shash qysqartatyn, kıimderin jóndeıtin burysh, dári-dármek salynǵan qoraptar qoıylǵan. Qatardaǵy jaýynger Berikbol Sarjanov esimdi jaýyngerdiń aıtýynsha, keste boıynsha ár shatyrlarda bir jaýynger kezekshilik atqarady.
– Osy jerge kelgenimizge jıyrma kúnge jýyq ýaqyt boldy. Jaýyngerler eń basty kerekterdiń bárimen jabdyqtalǵan. Keste boıynsha ár jaýynger 6 saǵattan kezekshilik atqarady. Jyly, yńǵaıly, azyq-túlik jetkilikti. Bul jerde basy artyq nárseniń qajeti de joq, – deıdi ol.
Polkovnık M.Qaraǵulovtyń aıtýynsha, jaýyngerler kún saıyn túske deıin – 3 saǵat, tústen keıin 3 saǵat jattyǵady. Bul olardyń saptyq jattyǵýlardy oıdaǵydaı meńgerýine, babynda bolýyna jetkilikti.
Lagerdiń shetinde arnaıy medısınalyq pýnkt te bar. Bilikti áskerı dárigerlerdiń aıtýynsha, dári-dármek jetkilikti. Qajet bolǵan jaǵdaıda medısınalyq kómek kórsetýge saqadaı-saı.
Qazaqstan Prezıdenti, Qarýly Kúshterdiń Joǵarǵy Bas Qolbasshysy N.Nazarbaevtyń tıisti Jarlyǵyna sáıkes, áskerı paradqa jumyldyryǵan jaýyngerler jattyǵýdy jospar boıynsha júrgizýde. Sáýir aıynyń alǵashqy kúninde paradtyq eseptoptar men mehanıkalyq kolonnalar jergilikti brıgadaǵa kelip jetken. 5 myńnan astam adamnyń qatarynda ofıserler, kelisimshart boıynsha jumys isteıtin áskerı qyzmetkerler, merzimdi áskerı qyzmet jaýyngerleri, áskerı oqý oryndarynyń kýrsanttary bar.
Lagerdegi kún tártibinine sáıkes, sarbazdar tańǵy 6:30-da uıqydan turady. Tazalaný, kıiný, tańǵy as, jattyǵýǵa daıyndyq ýaqyty, tıisti qarýlaryn alý saǵat 8:30-ǵa deıin aıaqtalady. Úsh saǵat jattyǵýdan keıin túski as ýaqyty keledi. Bir jerge shoǵyrlanǵan myńdaǵan adamdy bir mezgilde tamaqtandyrý qıynǵa soqqandyqtan, túski as ýaqyty sál uzaqqa sozylady. Saǵat 15:45-ten keshki 19:30-ǵa deıingi aralyqta jattyǵý jumystary qaıta jalǵasady. Qurlyq áskerleri bas qolbasshysynyń áskerı daıarlyq jónindegi orynbasary, general-maıor Talǵat Qoıbaqov sarbazdardyń jattyǵý barysyn ózi tikeleı qadaǵalap, tıisinshe baǵalaıdy. General-maıordyń aıtýynsha, eseptoptar qazirdiń ózinde birshama jaqsy nátıjege qol jetkizgen.
– Bul jattyǵýǵa Qarýly Kúshterdiń ǵana emes, Ulttyq qaýipsizdik komıtetiniń Shekara qyzmeti, Ishki ister mınıstrliginiń Ulttyq Ulany, Memlekettik kúzet qyzmeti, áskerı oqý oryndary da atsalysady. Buǵan deıingi paradtarǵa S.Nurmaǵambetov atyndaǵy «Jas ulan» respýblıkalyq mektebiniń ulandary ǵana qatyssa, bul joly elimizdegi basqa da oqý oryndarynyń oqýshylary, áskerı-patrıottyq klýbtardyń tárbıelenýshileri, Qorǵanys mınıstrligi áskerı-tehnıkalyq mektepteriniń shákirtteri qatysady. Paradty áskerı avtokólikterge mingen ardagerlerimiz bastap shyǵady, – deıdi T.Qoıbaqov.
Saptaǵy jaýyngerlerdiń arasynda názik jandylardan jasaqtalǵan rotalardy da baıqaǵan edik. Olarǵa jasalatyn jaǵdaı er-azamattardan múlde erekshelenbeıdi deýge bolady. Jalǵyz jeńildik – palatkada emes, kazarmada turatyndyǵy. Sebebi, olar birinshi kezekte áskerı qyzmetker, sodan keıin ǵana qyzdar degen qaǵıda qalyptasqan.
Jalpy, áskerı paradty uıymdastyrýdaǵy basty maqsat – halyqqa Qarýly Kúshterdiń qalaı damyǵanyn, el Táýelsizdigi men tutastyǵyn qamtamasyz etýge ázir ekendigin kórsetý. Sherýge Qarýly Kúshterdiń tańdaýly áskerı qyzmetshileri, bólimsheleri iriktelgen. Áskerıler halyqqa merekelik kóńil-kúı syılap qana qoımaı, tól áskerimizdiń qýatyn, tehnıkalyq turǵyda jabdyqtalýyn, elimiz ben halqymyzdyń egemendigi men qaýipsizdigin kúzetip júrgen áskerı qyzmetshilerdiń jaýyngerlik ázirligi men jaýyngerlik qabiletin kórsete bilýge tıis. Astananyń irgesinde paradqa qyzý ázirlenip jatqan jaýyngerler osy jaýapty mindetti laıyqty atqaryp shyǵýǵa tıis.
Bir top jýrnalıstiń Qorǵanys mınıstrligi uıymdastyrǵan medıa-sapar barysynda kózben kórip, kóńilge túıgenderi osy boldy.
Arnur ASQAR,
«Egemen Qazaqstan»
Sýretti túsirgen Erlan OMAROV,
«Egemen Qazaqstan»