Astanada QR Qarýly kúshteriniń qurylǵanyna 25 jyl tolýyna oraı áskerı sherý ótedi. Atalǵan sharaǵa daıyndyq barysynda jáne ony ótkizý kezinde áýe keńistigi paıdalanylady. Osyǵan oraı, Astana áýejaıy ushý kestesin ýaqytsha ózgertedi, dep habarlaıdy QazAqparat.
«Atap aıtqanda 21, 25, 26 sáýirde jergilikti ýaqyt boıynsha saǵat 09.20-den 13.00-ge deıin, 28, 29 sáýir jáne 02,03,04 mamyrda saǵat 10.00-den 13.00-ge deıin, sondaı-aq sherýdi ótkizý kezinde, 07 mamyr kúni saǵat 10.00-den 13.00-ge deıin Astana áýejaıy áýe tasymalyn toqtatady», – delingen baspasóz baıanynda.
Budan bólek, sherýdiń áýe bóligindegi jattyǵýlar ýaqytynyń ózgerýine nemese jaǵymsyz meteojaǵdaılarǵa, basqa da sebepterge baılanysty 24, 27, 30 sáýirde jáne 06 mamyrda rezervti kúnder engizilýi múmkin.