Astananyń M.Gorkıı atyndaǵy memlekettik orys drama teatrynda lıtvalyq rejısser Agnıýs Iаnkıavıchıýstiń jetekshiligimen «Anna Karenına» sahnalandy. Dramalyq montajda rejısserdiń obrazdyq sheshimdi oılastyrýda azamattyq kózqarasy aldyńǵy orynǵa shyqqan.
«Barlyq baqytty otbasylar bir-birine uqsaıdy. Al, baqytsyzdarynyń tarıhy árqıly» dep bastalatyn sóılem romannyń búkil júgin arqalap turǵandaı. Ekspozısııadaǵy ekeýdiń aıtysy spektakldiń atmosferasyn birden ańǵartady. Keıipkerler arasyndaǵy qarym-qatynas, oqıǵa ózgerisi jubaılyq urys-keris barysynda áıgilene túsedi. Rejısser A.Iаnkıavıchıýs: «2013 jyly M.Gorkıı teatrynyń basshylyǵy osy taqyrypty sahnalaýǵa usynys aıtqanda, kelispegen edim. Bıyl ekijaqty kelisimshart negizinde zamanaýı ózge shyǵarmalarymdy berip edim, ártúrli etıkalyq kózqaras turǵysynan qabyldanbady. Esesine «Anna Karenınany» taǵy usyndy. Alǵashqyda ne isteýge bolady dep oıladym. Sebebi bul taqyrypty sahnalamaq túgili, qoıyp kórsem degen maqsatym da bolmaǵan edi. О́ıtkeni roman – óte ádebı, teatr janryna beıimdele qoımaıtyn kúrdeli shyǵarma. Degenmen keıde avantıýrany unatatynym bar, usynysty osy sebepti qabyldadym»,– deıdi.
Turmystaǵy sylqym áıel Anna Karenınanyń bekette jas ofıser Vronskıımen kezdeısoq ushyrasýynyń sońy nemen tynaryn sol kezde eshkim bilmegen-tuǵyn. Qoıylymnan jalyndaǵan mahabbat jolyndaǵy kúres pen janpıdalyq izdeseńiz, jańylysqan bolar edińiz. Janushyra baqyt izdegen baqytsyz áıeldiń jandalbasalaýy latvııalyq rejısserdiń kórkem shyǵarma tabıǵatyn ózge qyrynan tanytqan poetıkalyq sheshimi dep aıtar edik.
– О́z jumysym týraly aıta qoıýǵa beıildi emespin. Ádette Anna Karenına týraly aıqanda mahabbat tarıhy, lırıka, sezim týraly sóz qozǵap jatady. Qudaı saqtasyn, biraq men bul shyǵarmanyń boıynan mundaı eshteńe kórip turǵanym joq, – deıdi rejısser.
Spektakldiń kórkemdik, ıdeıalyq mazmunyn ashýda Anna Karenına, jubaıy Alekseı Karenın men kóńildesi Alekseı Vronskıı úshtiginiń mańyzy zor. Ájimdi júzine qasiret izi uıalaǵan Aleksandr rólindegi Roman Chehonadskıı sahnany arpalys maıdanyna aınaldyra aldy. Sahnalyq beıneniń jan-dúnıesin túsinip, psıhofızıkasyn sezine bilgen ekinshi jan bolsa, ol – Svetlana Fortýna (Anna Karenına). Kóz jasymen de, shat kúlkisimen de kórermen oıyna qozǵaý sala bilgen aktrısanyń sýretkerlik tulǵalyǵy aıshyqtala túskendeı.
Ishki saraı jáne shynaı zaýyqpen oınap shyqqan juldyzdy akter trýppasynda bulardan bólek Maksım Iаshenko (Alekseı Vronskıı), Aleksandr Korjenko (Stıva Oblonskıı), Nına Drobotova (Lıdııa Ivanovna), Sergeı Mashtakov, Oksana Boıko men Sanjar Rahımov bar.
Oqıǵa bastan-aıaq Annanyń jatyn bólmesindegi qos tósek mańaıynda órbıdi. Kúńgirt sahnadaǵy keýdeleri kek pen yzaǵa, ókpe men renishke toly keıipkerlerdiń alqynysy birsaryndylyǵymen spektakldiń temporıtmin túsirip jibergendeı.
Qoıylym týraly qandaı da bir sáýegeılik tanytýdan aýlaqpyz, tek jazýshynyń shyǵarmashylyǵyn qadir tutatyn, rýhanı «pir» sanaıtyn oqyrman qaýym beı-jaı qalmasa kerek.
Aıa О́MIRTAI,
«Egemen Qazaqstan»