Qostanaı oblysynda tasqyn sýdan bolǵan shyǵyndardy anyqtap, zardap shekkenderge kómek kórsetý maqsatynda eki komıssııa quryldy. Onyń biri mal shyǵynyn, ekinshisi sýda qalǵan baspanalardyń jaǵdaıyn anyqtady. Qarǵyn sýdan barlyǵy 17 iri qara, 74 ýaq mal, 200 shamasynda shoshqa, 600-den artyq qus shyǵyn bolǵan. Ol barlyǵy 7 mıllıon 300 myń teńgeni qurady. Oblys ákimi Arhımed Muhambetov maly ólgen turǵyndarǵa aqshalaı kómek jaqyn kúnderi berile bastaıtynyn aıtty.
Komıssııa sý basqan 10 eldi mekendi aralap, 4 kúnniń ishinde 12 úıge jóndeý jumystary júrgizýdi, 5 úı buzyp, qaıtadan salýdy kerek etetinin anyqtady. Bul jumystardyń barlyǵy da ornyna keltiriletin boldy. Qazir oblysta tasqyn sýdan zardap shekkenderge kómek úshin arnaıy qor quryldy. Oǵan qazirdiń ózinde 10 mıllıon teńge aýdaryldy.
«Shyǵynnyń jalpy kólemi asa kóp deýge bolmaıdy, barlyǵy 200 mıllıon teńgeden sál asady. Biz respýblıkalyq bıýdjetke salmaq salmaımyz, qajetti qarjyny ózimiz tabamyz. Sýdan zardap shekkenderdiń eshqaısysy kómeksiz, nazardan tys qalmaıdy. Jaǵdaıdy baqylap otyrmyz. Qazir adamdar óz úılerine qaıtyp kelip jatyr. Sýda qalǵan aýyldardaǵy qarǵyn sý sorylyp, tazartý jumystary júrgizilýde» dedi oblystyq máslıhattyń kezekten tys sessııasynda Arhımed Begejanuly.
Sonymen qatar, sáýirdiń 15 jáne 16-sy kúnderi qardyń kúrt erýi sebebinen joldar da buzyldy.
«Negizinen oıpatta, ózen jaǵasynda ornalasqan eldi mekender sýda qaldy. Joldardy 12 jerden sý oryp ketti. Oǵan joldar astyndaǵy sý ótkizgish qubyrlar qýatynyń azdyǵy, jińishke bolǵandyǵy,tozǵandyǵy sebep boldy. Qarjy bólindi, kóp uzatpaı joldar da jóndeledi, ol jerlerdegi jáne jalpy sý ormaǵan joldar astyndaǵy sý ótkizgish qubyrlardyń da eni 4-5 esege deıin keńeıtiledi» dedi Arhımed Begejanuly.
Sonymen qatar, oblys ákimi sý tasqyny taza tabıǵı apat, oǵan eshkimniń de kinási joq ekenin eskertti. Kúnniń tez jylynýy, qardyń kúrt erýi jáne jańbyrdyń kóp jaýýy sebep bolǵan. Tasqynnyń alǵashqy kúninen bastap barlyq jaǵdaı oblys basshylyǵynyń baqylaýynda boldy. Qar sýynan zardap shekken eldi mekenderde oblys ákiminiń ózi, onyń orynbasarlary bolyp, jaǵdaıdy kózimen kórdi. Ýaqytyly qutqarý jumystary júrgizildi. Alaıda áleýmettik jelilerde keıbir blogerler Qostanaı oblysyndaǵy sý tasqyny týraly anyqtalmaǵan, artyq aqparattar berdi. Adam óliminiń tasqyn sýǵa eshqandaı qatysy bolmaǵan. Ákim onyń barlyǵy da jiti tekserilgenin, biraq áleýmettik jelidegi alyp-qashpa sózderdiń eshqaısysy dáleldenbegenin aıtty.
Názıra Járimbetova
«Egemen Qazaqstan»
QOSTANAI