27 sáýirde Qazaqstan Parlamenti Senatynyń Tóraǵasy Qaırat Mámı Túrki tildes elder Parlamenttik Assambleıasynyń (Túrk PA) Astanada ótip jatqan II jalpy otyrysy aıasynda Túrik Respýblıkasy Uly Ulttyq Jınalysynyń Tóraǵasy Mehmet Alı Shahın bastaǵan delegasııamen kezdesti, dep habarlady Parlament Senatynyń baspasóz qyzmeti.
Q.Mámı Qazaqstan men Túrkııa arasyndaǵy ekijaqty qatynastardy nyǵaıtýdaǵy osy sapardyń mańyzyn atap ótip, tarıhı tamyry ortaq eki memlekettiń arasyndaǵy strategııalyq áriptestiktiń qarqyndy damyp kele jatqanyna qanaǵattanǵandyq bildirdi.
Q.Mámı túrki álemindegi ekonomıkalyq, saıası jáne rýhanı yqpaldastyqty tereńdetýdegi Qazaqstan men Túrkııanyń mańyzdy rólin atap kórsetti. Bıylǵy qazan aıynda Qazaqstanda Túrki tildes memleketter yntymaqtastyq keńesiniń (Túrki keńesi) alǵashqy sammıtin ótkizý josparlanýda.
– «Bizdiń elimiz bul oqıǵaǵa erekshe mán berip otyr», – dedi Q.Mámı.
Senat Tóraǵasy Túrk PA qyzmetine jan-jaqty qoldaý bildiretinin jáne Qazaqstan baýyrlas halyqtar arasyndaǵy baılanystardy nyǵaıtý jónindegi ýaǵdalastyqtardy júzege asyrýda birlesken jumystardy júrgizýge ázir ekenin aıtty. Ol sondaı-aq TÚRKSOI aıasyndaǵy mádenı-gýmanıtarlyq jobalardy iske asyrýdyń keleshegi zor ekenin atap ótti.
Bıylǵy 28-30 maýsymda Astanada Islam Konferensııasy Uıymy Syrtqy ister mınıstrleri keńesiniń 38-sessııasy bolady. Tóraǵa aıtqandaı, Qazaqstan Islam Konferensııasy Uıymyna tóraǵalyq etý barysynda halyqaralyq jáne aımaqtyq qaýipsizdikti nyǵaıtý, mádenıetaralyq jáne dinaralyq únqatysýdy damytý jumystaryn jalǵastyrady.
Túrkııa Uly Ulttyq Jınalysynyń Tóraǵasy Prezıdent N.Nazarbaevtyń basshylyǵymen Qazaqstan qol jetkizgen tabystardy joǵary baǵalaı kelip, bizdiń elimizdiń Ortalyq Azııa aımaǵyndaǵy jetekshi rólin atap ótti. M.Shahınniń aıtýynsha, merziminen buryn ótken prezıdenttik saılaý qorytyndysy Elbasynyń saıasaty Qazaqstan halqynyń basym qoldaýyna ıe ekendigin taǵy bir kórsetti.
Q.Mámı, sondaı-aq Ázirbaıjan Mıllı Medjlısiniń Tóraǵasy Oktaı Asadovpen de kezdesti.